निर्माण सम्पन्न नहुँदै भित्तामा नाम लेखाउन उदघाटन गर्नु भ्रष्टाचारको नमुना : बालेन शाह

काठमाडौं । काठमाडौं महानगरपालिकाका मेयर बालेन शाहले निर्माण कार्य सम्पन्न नहुँदै भित्तामा नाम लेखाउन उदघाटन गरिएको भन्दै धरहरा उदघाटन गर्ने पूर्व प्रधानमन्त्री केपी ओलीलाई ब्यङ्ग गरेका छन् । उनले उदघाटन भएको २ वर्ष पछि निर्माण कार्य हुँदैगरेको भन्दै पार्किङ हटाउन पत्रकाटिएको प्रति कटाक्ष गरेका हुन् ।

महानगर प्रमुख बालेनले सामाजिक सञ्जालमा ‘धरहरा निर्माण हुदैछ । पार्किङ बन्द गर्नु ।’ भन्ने पत्र काटेको भन्दै उदघाटन गरेको २ बर्ष ९ महिना पछि पनि बनाएर नसकिएको लाज त्यागेर पत्र लेख्नुको औचित्य के हो ? भनी प्रश्न गरेका छन् ।

तत्कालिन प्रधानमन्त्री केपी ओलीबाट निर्माण सम्पन्न भयो भनी उद्घाटन गरेको भन्दै अहिले निर्माण कार्य हुदैछ भन्नुको औचित्य नरहेको उनको भनाइ छ ।

तोकिएको समयमा निर्माण भइनसक्ने, भित्तामा नाम लेख्ने हतारोमा निर्माण नभइ उदघाटन हुने जस्ता प्रवृतिलाई भ्रष्टाचारकै नयाँ प्रकृति मानिने राष्ट्रिय नीति बनाउन आवश्यक रहेको पनि उल्लेख गरेका छन् ।

उनले पत्रको अवज्ञा गर्ने संकेत गर्दै उक्त स्थानमा पार्किङ बन्द नहुने समेत बताएका छन् ।