रुपन्देहीमा ३ लाख १४ हजार ७ सय ३८ जना बालबालिकालाई दादुरा-रूबेलाविरुद्धको खोप लगाइँदै

बुटवल । रुपन्देहीमा ३ लाख १४ हजार ७ सय ३८ जना बालबालिकालाई दादुरा-रूबेलाविरुद्धको खोप लगाइने भएको छ । स्वास्थ्य कार्यालय रुपन्देहीका अनुसार ९ महिनादेखि १५ वर्षमुनीका ३ लाख १४ हजार ७ सय ३८ जना बालबालिकालाई दादुरा-रूबेलाविरुद्धको खोप लगाइने भएको हो ।

स्वास्थ्य कार्यालय रुपन्देहीका अनुसार खोप दुई चरणमा लगाइने छ । पहिलो चरणमा फागुन १३ देखि १७ सम्म ९ वटा पालिका तथा फागुन २० देखि २४ गतेसम्म ७ पालिकामा गरी खोप लगाइने छ ।

स्वास्थ्य कार्यालय रुपन्देहीका खोप अधिकृत तथा सूचना अधिकारी डा. भेषराज शर्माले पहिलो चरणमा बुटवल उपमहानगरपालिका, देवदह नगरपालिका, तिलोत्तमा नगरपालिका, लुम्बिनी साँस्कृतिक नगरपालिका, सिद्धार्थनगर नगरपालिका, ओमसतिया, रोहिणी, सियारी र शुद्धोधन गाउँपालिकामा दादुरा-रूबेलाविरुद्धको खोप लगाइने बताए । त्यस्तै दोस्रो चरणमा सैनामैना नगरपालिका, गैडहवा, कञ्चन, सम्मरीमाई, मर्चवारी, कोटहीमाई र मायादेवी गाउँपालिकामा खोप लगाइने उनले जानकारी दिए ।

‘जिल्लाका ९ वटा पालिकामा फागुन १३ गते अभियान सुरु गर्ने योजना बनाएका छौं’, शर्माले भने, ‘यसका लागि स्वास्थ्यकर्मीहरुलाई अभिमुखीकरण गर्ने काम भइसकेको छ ।’ नियमित खोप कार्यक्रममा छुट भएका बालबालिकालाई लक्षित गरी दादुरा-रुबेला खोप अभियान सञ्चालन गर्न लागिएको उनले जानकारी दिए । शर्माका अनुसार दादुरा-रूबेलाविरुद्धको खोपबाहेक अन्य खोप पनि नलगाएका बालबालिकालाई सोही अवधिमा लगाइनेछ ।

जिल्लाका १६ स्थानीय तहमा १ हजार १ सय ११ खोप केन्द्रबाट खोप लगाइने शर्माले बताए । उनले यो अभियानमा २ हजार २ सय स्वास्थ्यकर्मी र ३ हजार ३ सय जना स्वयंसेवक खटिने जानकारी दिए । जिल्लामा ३४ हजार ९ सय ३६ भायल एमआर भ्याक्सिन र ३ लाख ९१ हजार ५ सय ४ वटा सिरिञ्ज आवश्यक पर्ने शर्माले जानकारी दिए ।

खोप अभियान पूर्ण सफल बनाउन विभिन्न माध्यमबाट प्रचारप्रसार सुरु भएको स्वास्थ्य कार्यालयका खोप अधिकृत चिन्तामणि ज्ञवालीले बताए । ज्ञवालीले यो अभियान विद्यालय केन्द्रीत हुने जानकारी दिए ।

नेपालले सन् २०२६ सम्ममा दादुरा-रूबेला निवारण गर्ने प्रतिबद्वता व्यक्त गरेको छ ।