नेपालगन्ज । बाँकेको ढकेरीमा बाघको आक्रमणबाट एक जना बृद्धको ज्यान गएको छ । सल्यान, दार्मा गाउँपालिका वडा नम्बर १ घर भई ढकेरीस्थित आफन्त कहाँ आएका ७१ वर्षिय नगेन्द्रप्रसाद शर्माको बाघको आक्रमणबाट ज्यान गएको हो । पुर्वपश्चिम राजमार्ग अन्तर्गत बाँकेको राप्ती सोनारी गाउँपालिका वडा नम्बर ९ ढकेरीस्थित जंगलमा आइतबार बिहान बाघको आक्रमणबाट मृत्यु भएको अवस्थामा शर्माको शव फेला परेको बाँकेकी प्रदेशसभा सदस्य कृष्णा केसी नमुनाले जनाएकी छन् ।
शर्माको शव ढकेरी र चप्परगौडीबीचको जंगलमा आइतबार बिहान करिव साढे ५ बजेतिर फेला परेको इलाका प्रहरी कार्यालय कोहलपुरले जानकारी दिएको छ । प्रहरीका अनुसार मृतक शर्मा ढकेरीस्थित आफन्तको घरबाट शनिबार बेलुका कोहलपुर जान भनि निस्केका थिए ।
शवको प्रकृति हेर्दा वन्यजन्तुले आक्रमण गरेको जस्तो देखिएको भएपनि बाघले नै आक्रमण गरेको भने पुष्टी भइनसकेको प्रहरीको भनाई छ । घटनास्थल बाँके राष्ट्रिय निकुञ्ज क्षेत्रभित्र पर्दछ । जङ्गली जनवरको आक्रमण भएको देखिएपनि कुन जनावरको आक्रमण हो भन्ने नखुलेको इलाका प्रहरी कार्यालय कोहलपुरका प्रहरी निरीक्षक देवराज भट्टराईले बताए ।
घटनाको निकुन्ज प्रशासन र प्रहरीले अनुसन्धान थालेको बताइएको छ ।
प्रतिक्रिया