बुटवल । सत्ता गठबन्धनका शीर्ष नेताहरुले लुम्बिनी प्रदेशमा माओवादी नेतृत्वमा सरकार गठन गर्ने निर्णय गरे लगत्तै लुम्बिनी प्रदेशका मुख्यमन्त्री डिल्लीबहादुर चौधरीले प्रदेश सभाबाट विश्वासको मत लिने निर्णय गरेका छन् । मुख्यमन्त्री चौधरीले चैत २२ गते विहीबार विश्वासको मत लिने निर्णय गरेका हुन् ।
सरकारका प्रवक्ता तथा गृहमन्त्री सन्तोषकुमार पाण्डेका अनुसार मंगलबार बिहान बसेको प्रदेश सरकारको मन्त्रीपरिषद्को बैठकले विश्वासको मत लिन बिहीबार दिउँसो ४ बजे विशेष अधिवेशन आह्वान गर्न प्रदेश प्रमुख समक्ष सिफारिस गर्ने निर्णय छ ।
केन्द्रमा सत्ता समिकरण फेरिएसंगै लुम्बिनीमा माओवादी केन्द्रले २३ फागुनमा समर्थन फिर्ता लिएको थियो । संबिधान अनुसार सत्ता साझेदार दलले समर्थन फिर्ता लिएको एक महिना भित्र विश्वासको मत लिनुपर्ने प्राबधान छ । सोही अनुसार २२ चैतमा मुख्यमन्त्री चौधरीले विश्वासको मत लिन लागेका हुन् ।
लुम्बिनीमा एमालेका २९, काँग्रेसका २७, माओवादी केन्द्रका १० (सभामुख बाहेक), राप्रपा र नागरिक उन्मुक्तीका ४र४ जना र जनता समाजवादी, लोकतान्त्रिक समाजवादी र जनमत पार्टीका ३र३ जना सांसद छन् । लुम्बिनीमा एकीकृत समाजवादी र राष्ट्रिय जनमोर्चाका १र१ जना सांसद छन्, भने एक जना स्वतन्त्र सांसद छन् । राप्रपाका जानकीलाल यादव भ्रष्टाचारको मुद्दा दायर भएपछि निलम्बित छन् ।
एमाले, माओवादी केन्द्र, जसपा, नागरिक उन्मुक्ती पार्टी र एकीकृत समाजवादी पार्टी हुँदा नयाँ समीकरण अनुसार बनेको गठबन्धनको बहुमत पुग्ने देखिन्छ ।
गत वैशाख १४ मा लुम्बिनी प्रदेशको मुख्यमन्त्रीमा डिल्लीबहादुर चौधरी नियुक्त भएका थिए । वैशाख १९ मा मुख्यमन्त्री चौधरीले विश्वासको मत पाएका थिए ।
प्रतिक्रिया