उपनिर्वाचनका उम्मेदवार विरुद्ध आज उजुरी दिन सकिने

काठमाडौं । उपनिर्वाचनका लागि मनोनयन भएका उम्मेदवार विरुद्ध आज उजुरी लिइने भएको छ ।

निर्वाचन आयोगका अनुसार त्यसका लागि आज बिहान १० बजेदेखि ३ बजेसम्मको समय निर्धारण गरिएको छ । साँझ ५ बजे आयोगले उम्मेदवारको मनोनयन पत्र र उजुरी उपर जाँचबुझ गरी निर्णय गर्ने जनाइएको छ । त्यसअघि शनिबार उपनिर्वाचन हुने इलाम-२ मा २० जना र बझाङ-१ (क) मा १२ जनाले उमेदवारी दर्ता गराएका छन् ।

आयोगले सार्वजनिक गरेको कार्यतालिका अनुसार अनुसार चैत २६ गते अपराह्न ५ देखि साँझ ६ बजेसम्म उम्मेदवारको नामावली प्रकाशन हुनेछ । चैत २७ गते उम्मेदवारको नाम फिर्ता, उम्मेदवारको अन्तिम नामावली प्रकाशन तथा उम्मेदवारलाई निर्वाचन चिह्न प्रदान गरिने कार्यक्रम तय गरिएको छ ।

आगामी वैशाख १५ गते बिहान ७ देखि अपराह्न ५ बजेसम्म मतदान हुनेछ । इलाम-२ र बझाङ बझाङ-१ (क) मा आयोगले उपनिर्वाचन गर्ने तयारी स्वरूप प्रकिया सुरु गरेको हो ।