१७ वर्षीय किशोरको मलामी बोकेको ट्याक्टरले किचेर ३ वर्षीय बालकको मृत्यु

खजुरा । बाँकेको खजुरामा माटोको ढिस्कोले पुरेर मृत्यु भएका एक जना किशोरको दाहसंस्कारका लागि स्मसान घाट जाँदै गरेको ट्याक्टरले कुल्चिएर ३ वर्षिय बालकको मृत्यु भएको छ ।

बाँकेको खजुरा गाउँपालिका ६ सिमलघारीमा दाहसंस्कारको दाउरा र मलामी बोकेको ट्याक्टरले किचेर स्थानीय ३ वर्षिय बालक हिमांसु शाहीको मृत्यु भएको हो । प्रहरीका अनुसार आइतबार मानखोलामा माटो निकाल्ने क्रममा माटोको ढिस्कोले परेर स्थानीय १७ वर्षिय किशोर दीपेश ठकुरीको मृत्यु भएको थियो । ठकुरीको शवको पोष्टमार्टम पछि दाहसंस्कारका लागि मानखोला तर्फ जाने क्रममा लु ४ त ४५७५ नम्बरको ट्याक्टरले किचेर बालक शाहीको मृत्यु भएको हो ।

अत्याधिक गर्मी छल्न ट्याक्टरको छाँयामा बसेका बालकलाई चालकले नहेरी ट्याक्टर चलाउँदा ट्याक्टरको चक्काले बालकलाई किचेको इलाका प्रहरी कार्यालय धनौलीले जनाएको छ । ट्याक्टर र चालकलाई प्रहरीले नियन्त्रणमा लिएको छ ।