बुटवल । बुटवलको कालिकानगरस्थित कालिका पथमा वैधानिक फार्मेसी खोलेर अवैधानिक कार्य गरेको अभियोगमा एकजना फार्मेसी संचालकलाई बुटवल प्रहरीले पक्राउ गरेको छ । कालिकापथमा संचालनमा रहेको बैदवार फार्मेसीका सञ्चालकलाई प्रहरीले पक्राउ गरेको हो ।
फार्मेसीबाट डाक्टरको सिफारिसबिना औषधी बिक्री वितरण गर्ने गरेको र नेपालमा प्रतिबन्धित विभिन्न औषधि मिलाएर लागुऔषधका रूपमा युवाहरूलाई बिक्री वितरण गर्ने गरेको अभियोगमा फार्मेसी संचालक कमलबहादुर बिकलाई ईलाका प्रहरी कार्यालय बुटवलले नियन्त्रणमा लिएको हो ।
चिकित्सको सिफारिस बिना बिक्रि गर्न प्रतिबनध लगाइएको पेट दुख्दा खाने औषधि डाईसाकोमिन र प्रिगावलेन नामका दुई औषधि मिलाएर लागुऔषध प्रयोगकर्तालाई बिक्री गरेको भन्ने सूचनाका आधारमा बिकलाई पक्राउ गरिएको प्रहरीले जनाएको छ । लागुऔषध प्रयोगकर्ताहरूको सूचनाको आधारमा मेडिकलमा छापा मारेर पक्राउ गरिएको ईलाका प्रहरी कार्यालय बुटवलका प्रमुख डीएसपी विजय राज पण्डितले बताए ।
डाक्टरको सिफारिसबिना औषधि बिक्री वितरण गरेको केही औषधिहरू लागुऔषधका रूपमा प्रयोग गर्ने गरी मिलाएर बिक्री गरेको उजुरीका आधारमा पक्राउ गरिएको डीएसपी पण्डितले बताए । प्रहरीले मेडिकल सञ्चालकको घरबाट ठूलो परिणाममा त्यस्ता औषधि बरामद समेत गरेको छ ।
पक्राउ परेका बिकलाई औषधी व्यवस्था कार्यालय पठाउन तयारी भएको पनि उनले बताए । प्रहरीले बिक सहित केही लागुऔषध प्रयोगकर्तालाई नियन्त्रणमा लिएर अनुसन्धान अगाडि बढाएको छ ।
प्रतिक्रिया