भैसी झारफुक गराउन आएकी महिलामाथि झाँक्रीले गरे बोक्सी भन्दै कुटपिट

पाल्पा । पाल्पाको बगनासकाली गाउँपालिकामा धामी झाँक्रीको काम गर्ने एकजनाले भैसी फुकाउन आउकी महिलालाई बोक्सीको आरोप लगाउँदै कुटपिट गरेका छन् ।

बगनासकाली गाउँपालिका वडा नं. ९ बस्ने धामी झाँक्रीको काम गर्दै आएका २९ वर्षिय पदम बस्यालले आफ्नो भैंसी बिरामी भएको भन्दै फुकाउन आएकी महिलालाई बोक्सीको आरोप लगाउँदै कुटपिट गरेका हुन् । चामल अक्षेता लिएर भैसी सहित फुकाउन गएकी महिलालाई उल्टो बोक्सीको आरोप लगाउँदै बस्यालले कुटपिट गरेर घाइते बनाएको प्रहरीले जनाएको छ ।

प्रहरीका अनुसार ती महिलालाई झाँक्री बस्यालले ल्वाङ खन दिएको र तीम्रो आँखामा बोक्सी बसेको छ भन्दै पैयुको लौरो र हातको मुठीले देब्रे पाखुरा लगायत शरिरको विभिन्न भागमा निलडाम हुने गरी कुटपिट गरेका छन् । कुटपिटबाट घाइते भएकी महिलाले बोक्सी आरोप कसुर अन्तर्गत कारवाहीको माग गरेपछि प्रहरीले बस्याललाई नियन्त्रणमा लिएको छ ।

पक्राउ परेका बस्यालमाथि जिल्ला प्रहरी कार्यालयबाट अनुसन्धान अधिकृत तोकेर अनुसन्धान थालिएको पाल्पा प्रहरी प्रवक्ता प्रहरी नायव उपरीक्षक सुगन्ध श्रेष्ठले बताए ।