आन्दोलनरत रुवी खान नेतृत्वको समूहसँग वार्ता गर्न समिति गठन

काठमाडौं । गृह मन्त्रालयले आन्दोलनरत रुवी खान नेतृत्वको समूहसँग वार्ता गर्न तीन सदस्यीय समिति गठन गरेको छ ।

उपप्रधानमन्त्री एवं गृहमन्त्री रवि लामिछानेको निर्देशनपछि वार्ता समिति गठन गरिएको उनको सचिवालयले जनाएको छ । उपसचिव उमाकान्त अधिकारी, प्रहरी उपरीक्षक नीरञ्जनदत्त भट्ट र शाखा अधिकृत दिनेश न्यौपाने सदस्य रहने गरी समिति गठन गरिएको हो ।

समितिले खानसँग सम्पर्क गरी शनिबार नै वार्ता गर्ने तयारी गरेको छ । काठमाडौँका प्रमुख जिल्ला अधिकारी जितेन्द्र बस्नेतले आजै खानसँग भेटघाट गरेका थिए ।

निर्मला कुर्मी मृत्यु प्रकरणलाई हत्या भएको जिकिर गर्दै आन्दोलनरत रुबी खानले हत्याको अनुसन्धानलाई फितलो बनाइएको, पीडितको आफन्तलाई फंसाएर प्रहरीले ज्यादती गरेको तथा अनुसन्धानलाई अर्के मोड दिन खोजिएको भन्दै आमरण अनशन बसेकी छन् । बाँकेको जिल्ला प्रशासनमा धर्ना बसेपछि सुनुवाई नभएको भन्दै जेलभरो अभियान लिएर काठमाडौं पुगेकी रुबी अनशनका क्रममा बिरामी भएपछि अस्पतालमा भर्ना भएकी छन् ।