बुटवल । स्याङ्जा कारिकोट चण्डीभन्ज्याङ सम्पर्क समाज रुपन्देहीले रक्तदान कार्यक्रम गरेको छ । समाजको दोस्रो स्थापना दिवसको अवसर पारेर बिहिबार बुटवलमा रक्तदान कार्यक्रम गरेको हो ।
नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्री, समाजका अध्यक्ष शालिकराम पाण्डेले ब्लड ब्याग हस्तान्तण गरि शुभारम्भ गरे ।
कार्यक्रममा नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्रीले जन्मथलो र कर्मथलोलाई जोड्ने गरि समाजप्रति उत्तरदायी बनाउन महत्वपुर्ण योगदान भएको बताए ।
कार्यक्रमलाई निरन्तरताका साथ अझ भब्य रुपमा हुने गरि १७ वर्ष पार गरेका हरेक परिवारको सदस्यलाई जोड्दै लैजान उनले सुझाव दिए ।
रक्तदान गर्नुपुर्व परिक्षण हुने साथै रगत दान गरेपछि समेत रगतबाट सर्ने रोगहरुको बारेमा समेत थाहा पाउन सकिने हुदा निरोगिताको प्रमाणपत्र प्राप्त हुने उनले बताए । विज्ञानमा समेत रक्तदान धेरै बाच्ने आधार भएको प्रमाण पेश भएको उनले दाबी गर्दै रक्तदानको महत्व बुझाउन जरुरी रहेको उनले बताए । प्रत्येक वर्ष साउन १७ गते बुटवल जाउ, रक्तदान कार्यक्रममा सहभागी बनौ नारासहित स्थापना दिवसमा रक्तदान कार्यक्रम गर्दै आएको समाजका अध्यक्ष पाण्डेले बताए ।
कार्यक्रममा समाजका वरिष्ठ उपाध्यक्ष केशवराज कोईरालाले वार्षिक क्यालेण्डर नै बनाएर निरन्तर रक्तदान कार्यक्रमलाई जोड्दै आएको बताए । सामाजिक कार्यमध्ये सबैभन्दा पुण्य काम रक्तदान भएको उनले बताए ।
कार्यक्रममा सल्लाहकार पुरुषोत्तम पाण्डे, जग बहादुर रेश्मी, यम बहादुर सोमै, नैनसिह राना, सदस्य खड्ग बहादुर झेडीमगर, समाजका सचिव पिताम्बर शर्माले रक्तदाताहरुलाई मायाको चिनोबाट सम्मान गरेका थिए ।
नेपाल रेडक्रस सोसाईटी, रक्तसंचार सेवा केन्द्र बुटवलको प्राविधिक सहयोगमा भएको कार्यक्रममा ३० युनिट रगत संकलन भएको कार्यक्रम संयोजक तथा समाजका उपाध्यक्ष भवन कुमारी सोमैले बताईन । समाजमा ३८४ सदस्यहरु रहेका छन ।
प्रतिक्रिया