बुटवल । निजी क्षेत्रको पहिलो संस्था नेपाल चेम्बर अफ कमर्स लुम्बिनी प्रदेशको दोस्रो अधिवेशन आगामी शनिबार बुटवलमा हुने भएको छ । अधिवेशनका लागि चेम्वर लुम्बिनी प्रदेशले विभिन्न उप समितिहरु गठन गरी तयारी तीव्र पारेको हो ।
प्रदेश अधिवेशनका लागि जिल्ला, नगर र गाउं चेम्वरहरुले प्रतिनिधि छनोट गरिरहेको चेम्वर अफ कमर्स लुम्बिनीका अध्यक्ष टंक पोखरेलले बताए । नेपाल चेम्वर अफ कमर्स लुम्बिनीले जिल्ला, नगर, गाउं तहमा चेम्वरलाई विस्तार गर्नुका साथै एशोसिएट र वस्तुगत सदस्यता समेत प्रदान गरेको जनाएको छ ।
लुम्बिनी प्रदेशमा अहिले चेम्वरका ५० भन्दा बढी शाखाहरु छन् । जिल्ला, नगर र गाउं चेम्वरबाट ३ जनाका दरले प्रतिनिधि छनोट भएका छन् भने वस्तुगत र एशोसिएटबाट एकएक जना प्रतिनिधि छनोट हुनेछन् ।
अधिवेशनले अध्यक्ष १, वरिष्ठ उपाध्यक्ष १, जिल्लानगर उपाध्यक्ष १, वस्तुगत उपाध्यक्ष १, एशोसिएट उपाध्यक्ष १, महासचिव १, कोषाध्यक्ष १, सचिव २ र बांकी सदस्य सहित २७ सदस्यीय कार्यसमिति चयन गर्नेछ ।
अधिवेशन अन्तर्गत बुधबारदेखि निर्वाचन प्रकृया शुरु हुने महासचिव जे.पी.कंडेलले बताए । दोस्रो अधिवेशनसम्म आइपुग्दा लुम्बिनी प्रदेशमा चेम्वरले ब्यापक शाखा विस्तार गरेको बताउंदै महासचिव कंडेलले आगामी वर्षदेखि संस्थागत विकासमा जोड दिने बताए । शनिबार हुने अधिवेशनको उद्घाटन लुम्बिनी प्रदेशका मुख्यमन्त्री चेतनारायण आचार्यले गर्ने कार्यक्रम छ । सोही अवसरमा राष्ट्रिय योजना आयोगका सदस्य डा.प्रकाश श्रेष्ठ, लुम्बिनी प्रदेशका अर्थमन्त्री धनेन्द्र कार्की लगायतले सम्वोधन गर्नेछन ।
प्रतिक्रिया