बुटवल । शान्तिका लागि सञ्चार अभियानद्धारा सञ्चालित बुद्ध सामुदायिक टेलिभिजन आजदेखि १७ औं प्रवेशमा प्रवेश गरेको छ । वि.स. २०६५ सालमा कृष्ण जन्माष्टमीको दिन टेलिभिजनले आफ्नो प्रशारण सुरुवात गरेको थियो ।
वार्षिकोत्सवको अवसरमा बुद्ध सामुदायिक टेलिभिजनको कार्यालय बुटवलमा आज आयोजित कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेयले समाज रुपान्तरणमा टेलिभिजनको महत्वपूर्ण भूमिका रहेको बताए । उनले निष्पक्ष पत्रकारिता गर्नको लागि जोड दिँदै नेपालमै पहिलो मिडिया ग्राम बुटवलमा स्थापना गर्ने र यसको सुरुवात यसै वर्षबाट गरिने जानकारी दिए ।
मिडिया हाउसहरु पछिल्लो समय आर्थिक संकटबाट गुज्रीएको बताउँदै उनले मिडिया ग्रामको स्थापना गर्न सके मिडिया हाउसलाई बचाउन सकिने बताए । मिडिया हाउस बाँचे मिडियाकर्मी बाँच्ने बताउँदै मेयर पाण्डेयले आफ्नै कार्यकालमा जस्तोसुकै परिस्थितीको सामाना गरेर भएपनि मिडिया ग्रामको स्थापना गराएरै छाड्ने उनले प्रतिबद्धता ब्यक्त गरे ।
बुद्ध सामुदायिक टेलिभिजनका अध्यक्ष ओम प्रसाद ज्ञवालीले टेलिभिजनले समाजका कुरानै प्रमुख मुद्धा बनाउँदै आएको बताए । बुटवलमा मिडिया ग्रामको स्थापनाको आवश्यकता रहेको बताउँदै उनले उपमहानगरपालिकाले मिडिया ग्रामको स्थापना गरे मिडिया हाउसलाई ठुलो राहात मिल्ने बताए ।
बुद्ध सामुदायिक टेलिभिजनका पुर्व अध्यक्ष तथा वरिष्ठ अधिवक्ता बेनबहादुर पौडेल क्षत्रीले टेलिजिभनले अबका दिनमा आफ्नै भवन निर्माण गरेर प्रशारणको लागि पहल गर्नुपर्नेमा जोड दिए ।
नेपाल पत्रकार महासंघ रुपन्देहीका अध्यक्ष रामराज पोखरेलले बुटवल उपमहानगरपालिकाले मिडिया हाउस र मिडियाकर्मीको क्षमता बृद्धिको लागि महत्वपूर्ण भूमिका खेल्दै आएको चर्चा गरे ।
वार्षिकोत्सवको उद्घाटन समारोह टेलिभिजनका उपाध्यक्ष गोपाल ज्ञवालीको स्वागत तथा कार्यक्रम प्रमुख खेमराज रेग्मीको सञ्चालनमा कार्यक्रम सम्पन्न भएको छ । टेलिभिजनले वार्षिकोत्सवको अवसरमा रक्तदान, छात्रबृत्ति वितरण, तीज मिलन लगायतका रचनात्मक कार्यक्रम गरिने टेलिभिजनका कार्यकारी प्रमुख कपिल ज्ञवालीले जानकारी दिए ।
प्रतिक्रिया