बुटवल । बुटवलमा सञ्चालित पशु बधशालाको मासु मात्र बिक्री गर्न उपमहानगरपालिकाले मासु पसलहरुलाई कडाइ गरेको छ । बुटवल उपमहानगरपालिकाले लामो समयदेखि मासुजन्य वस्तु (खसीबोका) बधशालामा मात्रै बध गरेको बिक्री वितरण गर्नुपर्ने निमय लागू समेत गरेको हो ।
सोही अनुसार समय समयमा सचेत गराए पनि व्यवसायीले अटेर गरेपछि उपमहानगर कारवाहीमा उत्रिएको छ । बिहीबार विभिन्न सात वटा मासु पसलको अनुगमन गर्दा आफूखुसी काटेर बिक्री गरेको पाइएपछि १०-१० हजार रुपैयाँ जरिवाना गरेको छ । पटक-पटक स्वच्छ मासु मात्रै विक्रीको लागि आग्रह गर्दा समेत अटेरी गरेपछि जरिवाना गरिएको नगरपालिकाका पशु विकास शाखा प्रमुख झविन्द्र प्रसाद बन्जाडेले जानकारी दिए ।
बुटवल मिट सप्लार्यस, ज्योति माइला मासु पसल, सापकोटा मासु पसल, न्यू पहाडिया मासु पसल, भान्जा मासु पसल, बन्जाडे मासु पसल र पहाडिया मासु पसललार्ई जरिवाना गरिएको शाखा प्रमुख बन्जाडेले बताए । अनुगमनलाई उपमहानगरपालिकाले निरन्तरता दिने बताउँदै पहिलो पटक बधशालाको मासु नबेच्नेलार्ई १० हजार जरिवाना गरिएको बताए ।
दोस्रो पटक २५ हजार र तेस्रो पटक अनुगमन गर्दा पनि बाहिर बध गरेको मासु विक्री गरेको भेटिए ५० हजार जरिवाना हुनेछ । त्यसपछि पनि बधशालाको मासु विक्री नगरिए पसल नै बन्द गरिने शाखा प्रमुख बन्जाडेले बताए ।
बुटवल उपमहानगरपालिको बुटवलवासीको स्वास्थ्यप्रति विशेष संवेदनशील रहेको र अनिवार्य रुपमा वधशालामा बध गरिएको मासु मात्रै विक्री वितरण गर्न र बध गरिएको मासु मात्रै उपभोग गर्न आग्रह गरेको छ ।
प्रतिक्रिया