काठमाडौँ । तिहार सकिए लगत्तै रास्वपा सभापति तथा पूर्व गृहमन्त्री रवि लामिछानेलाई बुटवलमा ल्याउने तयारी गरिएको छ । बुटवल स्थित सुप्रिम बचत तथा ऋण सहकारीको रकम अपचलनबारे अनुसन्धान गरिरहेको रुपन्देही प्रहरीले लामिछानेलाई रुपन्देहीमा उपस्थित गराउन कास्की प्रहरीलाई पत्र पठाएको छ ।
रुपन्देहीका प्रहरी प्रमुख रञ्जित सिंह राठौरका अनुसार बुटवल स्थित सुप्रिम बचत तथा ऋण सहकारीको रकम अपचलनबारे अनुसन्धान गर्न लामिछानेलाई रुपन्देहीमा उपस्थित गराउन कास्कीमा पत्राचार गरिएको छ । चाडपर्वको बिदा रहेकाले सार्वजनिक बिदा सकिए लगत्तै रुपन्देही झिकाएर बयान लिइने एसपी राठौरले बताए । पक्राउ पुर्जी जारी भए लगत्तै कास्कीलाई पत्राचार गरिएको जनाउँदै उनले अनुसन्धानमा रहेका सबैलाई रुपन्देही झिकाइने र फरारको खोजि पनि जारी रहने बताए ।
बुटवल स्थित सुप्रिम बचत तथा ऋण सहकारीबाट रास्वपाका सभापति लामिछानेको नाममा ऋण प्रवाह भएको सम्बन्धमा प्रहरीको अनुसन्धान जारी छ । बुटवल उप महानगरपालिका–९ राजमार्ग चौराहामा सञ्चालित सुप्रिम बचतबाट लामिछानेले २०७७ चैत १८ मा २ करोड ऋण लिएको र सो रकम गोरखा मिडिया नेटवर्क प्रा।लिको ग्लोबल आईएमई बैंक लिमिटेडेको खातामा जम्मा गरेको भेटिएको छ । सोही प्रकरणमा २०८१ वैशाखमा रुपन्देही जिल्ला अदालतमा मुद्दा दायर गरिएको छ ।
ओखलढुंगाको सुनकोशी गाउँपालिका घर भएका गितेन्द्रबाबु (जीबी) राई र पूर्व उपराष्ट्रपति पुत्र दीपेश कुमार पुनसहित २८ जनालाई प्रतिवादी कायम गरेर यसअघि नै अदालतमा मुद्दा दायर गरिएको थियो ।
सूर्यदर्शन सहकारीको रकम अपचलनमा संलग्न आरोपमा कार्तिक २ मा पक्राउ परेका लामिछानेलाई अहिले जिल्ला प्रहरी कार्यालय कास्कीको हिरासतमा राखिएको छ ।
प्रतिक्रिया