नेपालगन्ज । नेपाल पत्रकार महासँघ बाँकेले नवनिर्वाचित पदाधिकारी तथा कार्यसमिति सदस्यहरूका साथै सम्पूर्ण साधारण सदस्यहरूलाई अनिवार्यरुपमा मिडिया आवद्धता कायम गरी सञ्चार कर्म गर्न आह्वान गरेको छ । महासंघको नव निर्वाचित कार्यसमितिको पहिलो बैठकले यस्तो आह्वान गरेको हो ।
बैठकपछि महासंघ बाँके शाखाका सचिव कृष्ण ओलीले जारी गरेको विज्ञप्तिमा पत्रकार आचारसंहिताको पूर्ण पालना गरेर जिम्मेवार परकारिताका लागि समेत अनुरोध गर्ने निर्णय गरेको उल्लेख गरिएको छ । महासंघका सदस्यहरु पेशागत मर्यादा बाहिरको कृयाकलापमा संलग्न भएको भन्दै नागरिकस्तरबाट आलोचना भएपछि पत्रकार अगुवाहरुले पेशागत इमान्दारिता र मर्यादाका लागि सुझाउँदै आएका थिए ।
बैठकले पूर्वअध्यक्षहरुले दिएको सुझावलाई मार्गनिर्देशकारुपमा पालना गर्ने निर्णय गर्दै शाखाको संस्थागत विकास तथा पत्रकारहरुको हकहित तथा व्यवसायीक सुरक्षाका लागि दृढसंकल्पित रहने प्रतिबद्धता जनाएको छ ।
बैठकले निर्वाचन मर्यादित र सभ्यढंगले संचालन भएकोमा निर्वाचन समिति, महासंघमा आवद्ध मतदाता सदस्यहरु सहित सम्बद्धहरुलाई धन्यवाद पनि प्रकट गरेको छ ।
प्रतिक्रिया