काठमाडौं । दक्षिण कोरियामा आज बिहान भएको विमान दुर्घटनामा मृत्यु हुनेको संख्या १७९ पुगेको अधिकारीहरुले बताएका छन् । विमानमा सवार १८१ जनामध्ये २ जनाको जीवितै उद्धार गरिएको थियो । उनीहरु मध्य एक जना चालक दलका सदस्य र एक जना यात्रु भएको अधिकारीहरुले जनाएका छन् ।
जीवितै उद्धार गरिएका बाहेक अरु कोही पनि जीवित फेला नपरेको अधिकारीहरुलाई उद्धृत गर्दै दक्षिण कोरियाको योनहाप समाचार एजेन्सीले जनाएको छ । उनीहरुको उपचार मोकपो अस्पतालमा भइरहेको छ ।
दुर्घटनालगत्तै अग्नि नियन्त्रकसहितका उद्धारकर्ताले उनीहरुको उद्धार गरेका थिए ।
थाइल्याण्डको बैंककबाट कोरिया आएको जेजु एयरको विमान दक्षिण कोरियाको मुआन अन्तर्राष्ट्रिय विमानस्थलमा अवतरणको क्रममा दुर्घटना भएको थियो । विमानमा चालक दलका ६ सदस्यसहित १८१ जना सवार थिए । उनीहरुमध्ये दुई जना थाइल्याण्डका र बाँकी सबै दक्षिण कोरियाका नागरिक रहेको पनि एजेन्सीले जनाएको छ ।
समाचार एजेन्सीका अनुसार विमान दुर्घटनाको कारण खुलि नसकेको जनाउँदै अधिकारीहरुले विमान धावनमार्गमा चिप्लिएर बारमा ठोक्किएको बताएका छन् । ठोक्किए लगत्तै विमानमा आगो लागेको थियो ।
विमान दुर्घटना दक्षिण कोरियाको जेओला प्रान्तको मुआन काउन्टीस्थित मुआन अन्तर्राष्ट्रिय विमानस्थलमा भएको हो । यो विमानस्थल राजधानी सियोलबाट २८८ किलोमिटर दक्षिण पश्चिममा पर्दछ ।
प्रतिक्रिया