दाङ । रोल्पामा सुन्तला बोकेर दाङतर्फ आउँदै गरेको जीप दुर्घटना हुँदा चालकको मृत्यु भएको छ । तीन जना बालिका गम्भीर घाइते भएका छन् ।
चालक माडी गाउँपालिका-१ भित्तावाङका २० वर्षीय हुकुम घर्तीको मृत्यु भएको जिल्ला प्रहरी कार्यालय रोल्पाले जानकारी दिएको छ ।
दुर्घटनामा परि त्रिवेणी गाउँपालिका-४ की १४ बर्षीया दिलमाया घर्ती मगर, सोही ठाउँकी १२ बर्षीया सरिता घर्ती मगर, त्रिवेणी-२ नुवागाँउकी ११ वर्षीया करुण बाँठा मगरलाई पिकअपले च्यापेको अवस्थामा उद्धार गरि उपचारका लागि दाङको तुलसीपुर तर्फ पठाइएको रोल्पा प्रहरीले जानकारी दिएको छ ।
पिकअप सडकबाट खसेपछि चालकसहित चार जनालाई च्यापेको थियो । पिकअपले च्यापेको अवस्थामा तीन बालिकाको उद्धार गरिएपनि चालकको उद्धार गर्न समस्या भएको थियो ।
शुक्रबार बेलुका पौने ५ बजेतिर त्रिवेणी गाउँपालिका-४ सिमपानीमा लु १ च ८६८७ नम्बरको सुन्तला बोकेर दाङको तुलसीपुर तर्फ आउँदै गरेको जीप अनियन्त्रित भइ दुर्घटना हुँदा झन्डै २५ मिटर तल खसेको थियो । उक्त पिकअप जीप माडी गाउँपालिका-१ पेदीखोलादेखि सुन्तला बोकेर तुलसीपुर आउँदै थियो ।
प्रतिक्रिया