काठमाडौं । नेकपा माओवादी केन्द्रले सरकारले ल्याएका अध्यादेशहरू विरुद्ध सदनमा सशक्त ढंगले प्रतिवाद गर्ने निर्णय गरेको छ ।
बिहीबार बसेको माओवादी संसदीय दलको बैठकले सरकारले प्रक्रियागत हिसाले नै गलत ढंगले अध्यादेश ल्याएकाकारण त्यको सशक्त विरोध गर्ने निर्णय गरेको हो ।
माओवादी प्रमुख सचेतक हितराज पाण्डेले अध्यादेश अस्वीकार गर्ने निर्णय भएको बताए ।
‘अध्यादेशको प्रक्रिया लोकतन्त्रलाई सवलीकरण गर्ने गरी आएन, प्रक्रिया नै बेठिक छ’, पाण्डेले भने, ‘समितिमा रहेका विधेयकका फिर्ता नै नलिई अध्यादेश ल्याउनु गलत भएकाले अस्वीकारको सूचना दर्ता गर्नुपर्छ भन्ने निर्णय भएको छ ।’
बैठकले विपक्षी दलहरुबीच भएको सहमतिअनुसार संसदमा अघि बढ्ने पनि निर्णय गरेको छ । भोलिबाट सुरु हुने संसद्को हिउँदे अधिवेशनमा ‘आफ्नो दलको तर्फबाट सशक्त रुपमा जनताका आवाज संसद्मा उठाउनुको साथसाथै विपक्षी दलहरूसँग पनि मतऐक्यता हुनसक्ने विषयमा सामूहिक रुपमा आवाज बुलन्द गर्ने’ निर्णय भएको प्रमुख सचेतक पाण्डेले बताए ।
प्रतिक्रिया