नेपालगन्ज । नेपालगन्ज उद्योग वाणिज्य संघले नेपालगन्जमा आयोजना गरेको प्रादेशिक महोेत्सव २०८१ को बुधबार औपचारिक रुपमा समापन गरिने भएको छ ।
महोत्सवमा दिन थप गर्नुपर्ने चौतर्फी दवाब आए पनि संघले निर्धारित मिति मंगलबार नै सकिएकाले बुधबार औपचारिक कार्यक्रम गरी समापन गर्ने तायारी गरिएको प्रचार उप–समितिका संयोजक डम्बरबहादुर चन्दले जानकारी दिए । दिउँसो २ बजे सडक डिभिजन परिसरमा समापन समारोह हुने उनले बताए ।
महोत्सवको समापन समारोहमा पनि संगीतमय हुने जनाइएको छ । महोत्सवको सांस्कृतिक उप–समितिका संयोजक मख्खन बहादुर धामीले बुधबार बाल गायक सुप्रिम मल्लको एकल प्रस्तुती रहने जानकारी दिए । संघले यस अघि नै मल्ललाई डाकेको भए पनि आउन पाएका थिएनन् ।
प्रमोद खरेलले मच्चाए हंगामा
नेपालगन्जमा जारी प्रादेशिक महोत्सवको अन्तिम दिन लोकप्रिय गायक प्रमोद खरेलले आफ्नो प्रस्तुती प्रदर्शन गरे । जब फुल बुट्टे चोेलीको तुना चलायौं तिमी…..ले भन्दै गायक खरेलले सडक डिभिजन परिसरको महोत्सवको स्टेजमा उक्लेपछि हंगामा भो भन्दै हंगामा मचाए । उनले आफ्ना लोकप्रिाय आधा दर्जन बढी गीत गाएका थिए ।
गायक अर्जुन कौशल र देउडा गायिका निरुता खत्रीको पनि प्रस्तुती रहेको थियो । गायिका मञ्जु पौडेल र पत्रकार तिलक गाउँलेले महोत्समको कार्यक्रम सञ्चालन गरेका थिए ।
प्रतिक्रिया