नेपालगन्ज । नेपालगन्जका उद्योगी व्यवसायीहरुले नेपालगन्ज उद्योग वाणिज्य संघ मार्फत प्रधानमन्त्री दैवी प्रकोप उद्दार कोषमा सहयोग जम्मा गरेका छन् । संघको तर्फबाट राहत कोषमा जम्मा हुने गरि ६ लाख एक हजार रुपैयाँ सहयोग हस्तान्तरण गरिएको हो ।
संघले कोषका नाममा काटिएको ६ लाख १ हजारको चेक आज बाँकेका प्रमुख जिल्ला अधिकारी दीलकुमार तामाङलाई हस्तान्तरण गरेको छ । उद्योग वाणिज्य संघ नेपालगन्जका नव निर्वाचित अध्यक्ष चिरञ्जीवी ओलीसहितको टोलिले जिल्ला प्रशासन कार्यालय बाँके पुगेर सहयोग रहकम हस्तान्तरण गरेको हो । अध्यक्ष ओलीको नेतृत्वमा पूर्वअध्यक्ष कृष्णप्रसाद श्रेष्ठ, नन्दलाल वैश्यसहित कार्य समितिका पदाधिकारी र सदस्य सम्मिलित प्रतिनिधिहरु चेक हस्तान्तरण गर्न जिल्ला प्रशासन कार्यालय पुगेका थिए ।
कोषमा जम्मा गरिएको रकममा संघले संस्थागत रुपमा १ लाख ५१ हजार र अरु रकम अध्यक्ष चिरञ्जीवी ओलीले १ लाख ११ हजार, पूर्वअध्यक्ष, कार्य समितिका पदाधिकारी, सदस्य र उद्योगी व्यवसायीले व्यक्तिगत रुपमा संकलन गरिएको संघले जनाएको छ ।
चीनको तिब्बतमा हिमताल फुटेर १० भदौमा भोटेकोशी नदीमा आएको विनासकारी बाढीका पीडितहरूको राहत, उद्धार तथा पुनर्स्थापनामा सघाउन सम्पूर्ण उद्योगी, व्यवसायीलार्ई आ(आफ्नो क्षमताअनुसार सक्दो सहयोग गर्न अध्यक्ष ओलीले अपील गरेका छन् ।
प्रतिक्रिया