बुटवल । रुपन्देहीमा जारी २३ औं तिलोत्तमा गोल्डकप नकआउट फुटबल प्रतियोगिता अन्तगत दोस्रो क्वाटरफाईनल खेलमा ए डिभिजन विजेता चर्च ब्याईज युनाईटेड विजयी हुदै अन्तिम चारमा स्थान बनाएको छ । विभागिय टिम नेपाल पुलिस क्लबलाई ट्राईबेकरमा ४-३ गोल अन्तरले पराजित गर्दै सेमीफाईनलमा स्थान बनाएको हो ।
यो सिजनमा विभिन्न ४ वटा प्रतियोगिताको उपाधि विजेता चर्चले तिलोत्तमा गोल्डकपमा दाबेदारी समेत पेश गरेको छ ।
देविनगरस्थित एन्फा टेक्निकल खेलमैदानमा भएको निक्कै प्रतिस्प्रात्मक खेलमा शुरुवाट नै चर्च हाबी बन्यो । पहिलो हाफमा पाएको धेरै अवसर गुमाएको चर्च गोलरहित बराबरीमा रोकियो । दोस्रो हाफमा आक्रमक खेल प्रस्तुत गरेको पुलिसबाट पनि गोलका अवसर गुम्यो । निर्धारित समयमा दुबै टिमबाट गोल हुन नसक्दा खेल ट्राईबेकरमा धकेलियो ।
ट्राईबेकरमा चर्चका अमन लामा, चेतन चौधरी, अरमान बिउडियम र प्रवेश कुवरको प्रहार गोलमा परिणत भयो । आकाश राई र सर्जजो डिकोको प्रहार रोकीदिए ।
यता नेपाल प्रहरी क्लबका प्रज्वल चौधरी, गोलकिपर अमित टमाटा, अरुण गाहाले गोल गरे । मान बहादुर परियार बाहिरियो । ओसेन्द्र कटुवाल र विवेक पाण्डेको प्रहार बारमा लागेर बाहिरियो ।
खेलमा चर्च ब्याईजका अमन लामा म्यान प्लेयर अफ दी म्याचबाट पुरस्कृत भए । सोमबार प्रतियोगिताको तेस्रो खेलमा संकटा एफसी र जर्जियन एफसी भारतका बिचमा हुने संघका अध्यक्ष लोक पुनले बताए ।
प्रतिक्रिया