काठमाडौं । समाजवादी मोर्चाले चैत १५ गते राजावादीहरुले हिंसात्मक प्रदर्शन गर्दा पुर्याएको क्षतिपूर्ति उनीहरुबाटै भराउन माग गरेको छ ।
माओवादी केन्द्रको कार्यालय पेरिसडाँडामा बसेको मोर्चाको बैठकले क्षतिपूर्ति उनीहरुबाटै भराउन माग गरेको हो ।
बैठकपछि संचारकर्मीसँग कुरा गर्दै हिंसात्मक गतिविधि गर्नेबाट क्षतिपूर्ति भराउन सरकारसँग माग गर्ने, कानुनबमोजिम कारबाहीका लागि माग गर्ने र गणतन्त्रवादी शक्तिहरूसँग अन्तरक्रिया गर्ने निर्णय गरेको नेकपाका नेता खड्गबहादुर विश्वकर्माले जानकारी दिएका छन् ।
उनले भने, ‘यो घटना डिजाइन गरेर जति क्षति भएको छ । सबैको क्षतिपूर्तिका लागि पनि सरकारसँग कुरा गर्नुपर्छ । जो मान्छेले क्षति गरे त्यो मान्छेबाट सरकारले क्षतिपूर्ति भराउनुपर्छ ।’
दरबारिया र प्रतिगामी तत्वहरूले कोटेश्वरमा असाध्यै गैरजिम्मेवार, हिंसक, देशमा अशान्ति र आतंक मच्चाउने गतिविधि गरे भनेर समीक्षा गरियो’, उनले भने ।
बैठकले क्रान्तिका उपलब्धि रक्षा गर्न युवालाई संगठित रूपमा परिचालन गर्ने निर्णय गरेको छ ।
बैठकमा माओवादी अध्यक्ष प्रचण्ड, एकीकृत समाजवादीका अध्यक्ष माधवकुमार नेपाल, नेकपाका अध्यक्ष नेत्रविक्रम चन्द र नेपाल समाजवादी पार्टीका अध्यक्ष महिन्द्रराय यादवलगायतका नेताहरु सहभागी थिए ।
प्रतिक्रिया