वार्ता गर्न गएका शिक्षकहरू सिंहदरबार गेटबाट फर्किए

काठमाडौं । सरकारसँग वार्ता गर्ने भनेर सिंहदरबार गएका शिक्षक नेताहरु गेटबाटै फर्किएका छन् ।

सरकारले आफुखुशी शिक्षक वार्ता टोलीको नाममा गेट पास जारी गरेको आरोप लगाउँदै शिक्षक नेताहरु गेटबाटै फर्किएका हुन् ।

शिक्षा, विज्ञान तथा प्रविधि मन्त्रालयबाट सार्वजनिक भएको २५ सदस्यीय नामावली आफुहरुले तयार नगरेको नेपाल शिक्षक महासङ्घले जनाएको छ ।

‘शिक्षा विज्ञान तथा प्रविधि मन्त्रालयबाट सार्वजनिक भएको २५ सदस्यीय नामावली नेपाल शिक्षक महासंघले तयार नगरेको ब्यहोरा जानकारी गराउँछौं’, शिक्षक महासंघका अध्यक्ष लक्ष्मीकिशोर सुवेदीले सुवेदीले फेसबुकमा लेखेका छन्, ‘वैशाख १२ गते नवनियुक्त मन्त्रीज्यूसँग औपचारिक भेटका लागि हामी जाने क्रममा थियौं तर विशेष कारणवश आज हामी मन्त्रालय प्रवेश नगरी फर्किएको कुरा जानकारी गराउँछौं।’