काठमाडौं । नेकपा (एकीकृत समाजवादी)मा हालैमात्र समाहित भै वरिष्ठ नेता बनेका बामदेव गौतमले आफूलाई काम नदिए सो पार्टीमा धेरै दिन नबस्ने बताएका छन् ।
बुधबार कीर्तिपुरमा आयोजित ४७औँ पुष्पलाल स्मृति दिवसको अवसरमा बोल्दै नेता गौतमले आफुलाई पदको लोभ नभएको स्पष्ट पार्दै पार्टीभित्र जिम्मेवारीसहितको भूमिका दिन आग्रह गरेका छन्। उनले पार्टीले काम गर्ने अवसर नदिएमा लामो समयसम्म पार्टीमा टिक्न नसक्ने चेतावनीसमेत दिएका छन्।
गौतमले आफू पदका लागि नभई कामका लागि पार्टीमा आएको बताए। “मलाई के पद दिने भनेर कुरा उठेको छ, तर म दोहोर्याएर भन्छु – मलाई पद चाहिएको छैन। मलाई काम देऊ। काम गर्नका लागि जुनसुकै पद सिर्जना गर्नुपर्छ, त्यो गरिदेऊ।” उनले कामविहीन पद आफूलाई नचाहिने स्पष्ट गर्दै भने, “काम नदिने हो भने म पार्टीमा टिक्दिन। म काम नगरी बस्न सक्दिन।”
गौतमले संविधानमा उल्लेख भएको समाजवादको निर्माणमार्फत नेपाललाई संसारकै विकसित समाज बनाउने दिशामा अघि बढ्नुपर्नेमा पनि जोड दिए। उनले कार्यदक्षता, विचारधारा र अभियानसहितको सक्रिय भूमिकाका लागि आफू तयार रहेको भन्दै पार्टीले त्यो अवसर दिनुपर्ने बताए।
वरिष्ठ नेता गौतमको यस्तो अभिव्यक्तिलाई पार्टीभित्र कार्य विभाजन र नेतृत्व शैलीप्रति संकेतपूर्ण असन्तुष्टि मानिएको छ।
प्रतिक्रिया