काठमाडौं । निजामती सेवासम्बन्धी विधेयकमा उल्लेख भएको दुई वर्षे ‘कुलिङ पिरियड’को प्रावधान हटाउने नेकपा (एमाले)का सांसदहरूले दर्ता गराएको संशोधन प्रस्तावप्रति नेपाली कांग्रेस नेताहरूले गम्भीर असन्तुष्टि जनाएका छन्।
शुक्रबार बूढानीलकण्ठमा बसेको कांग्रेस नेताहरूको बैठकमा सो विषयमा व्यापक छलफल भएको हो। बैठकमा नेताहरूले एमालेसँग भएको पूर्वसहमतिको विपरीत संशोधन प्रस्ताव दर्ता गरिएको भन्दै आपत्ति जनाएका हुन्।
नेताहरूले सहमतिको आधारमा अघि बढ्नुपर्नेमा संशोधन प्रस्ताव पार्टीगत रुपमा दर्ता भएको खण्डमा सहमतिप्रति नै प्रश्न उठ्ने बताएका छन्। “यदि प्रस्ताव पार्टीको निर्णयअनुसार आएको हो भने सहमति भंग भएको ठहर्छ, होइन भने विगतको सहमति अनुसार अघि बढ्नुपर्छ,” एक नेताले बैठकपछि बताए।
बैठकमा रूपन्देही–३ मा हुने उपनिर्वाचनबारे पनि विशेष छलफल गरिएको जनाइएको छ। उपनिर्वाचनका लागि बालकृष्ण खाँणले ब्रिफिङ गरेका छन् । खाँण २०७९को निर्वाचनमा सो क्षेत्रबाट पराजित उम्मेदवार हुन् ।
बैठकमा पार्टी पदाधिकारी, पूर्वपदाधिकारी, मन्त्रीहरू, र प्रदेश सभापतिहरूको सहभागिता रहेको थियो।
प्रतिक्रिया