काठमाडौं । नेकपा माओवादी केन्द्रको स्थायी समितिको बैठक आजबाट सुरु भएको छ । तीनदिन चल्ने बैठकको पहिलो दिन पार्टीका अध्यक्ष पुष्पकमल दाहाल प्रचण्डले १० बुँदे ‘ब्रिफिङ’ प्रस्तुत गरेका छन् । उनले बैठकमा ‘ब्रिफिङ’ गर्दै पार्टीलाई सरकार बनाउने भत्काउने खेलमा केन्द्रीत नगरि संगठन बलियो बनाउने विषयमा केन्द्रित हुनुपर्ने बताएका छन् ।
स्थायी कमिटी बैठकमा अध्यक्ष प्रचण्डले संगठन निर्माणमा पार्टीलाई केन्द्रित बनाउनु पर्ने विषयमा जोड दिएको पार्टी सचिव देवेन्द्र पौडेलले जानकारी दिए । उनका अनुसार प्रचण्डले पार्टीको आन्तरिक कुरा पार्टीभित्रै छलफल गर्नुपर्नेमा जोड दिँदै आन्तरिक विषयहरु बाहिर नलैजान आग्रह गरेका थिए ।
बैठकमा अध्यक्ष प्रचण्डलाई उदृत गर्दै पौडेलले भने, ‘सरकार बनाउने भत्काउने अहिले हाम्रो कुनै जमर्को छैन । यो विषयमा नलागौं ।’ प्रचण्डले पार्टीको मध्यपहाडी लोकमार्गमा सुरु गरि बिचमा स्थगित गरिएको जागरण अभियानलाई वर्षा सकिए लगत्तै सुरु गर्ने प्रस्ताव गरेका छन् । अभियान सकिएपछि मात्र केन्द्रीय कमिटी बैठक बस्ने प्रस्ताव बैठकमा प्रचण्डले गरेको पौडेलले बताए । पौडेलका अनुसार केन्द्रीय कमिटी बैठकले पार्टीको महाधिवेशनको मिति तय गर्नेछ ।
माओवादी पार्टीको स्थायी कमिटी बैठक तीन दिनसम्म चल्ने छ ।
प्रतिक्रिया