काठमाडौं । प्रधानमन्त्री केपी शर्मा ओलीले नागढुंगा-नौबिसे सुरुङमार्गको निर्माण कार्य अन्तिम चरणमा पुगेको बताएका छन् ।
सामाजिक सञ्जाल फेसबुकमार्फत जानकारी दिंदै उनले सुरुङमार्गको करिब ९३ प्रतिशत काम पूरा भइसकेको र यसलाई छिट्टै सञ्चालनमा ल्याइने बताएका हुन् ।
प्रधानमन्त्री ओलीले सुरुङमार्ग सञ्चालनमा आएपछि काठमाडौं उपत्यका भित्रने र बाहिरिने यात्रुहरूलाई ठूलो सहजता मिल्ने विश्वास व्यक्त गरेका छन् ।
उनले भनेका छन्, “नौबिसे-नागढुंगा सुरुङमार्ग निर्माणको काम अन्तिम चरणमा पुगेको छ । यसलाई सञ्चालनमा ल्याएपछि नागढुंगाबाट ओहोरदोहोर गर्दा हुने दीर्घकालीन समस्या अन्त्य हुनेछ ।”
सुरुङमार्ग निर्माण अन्तिम चरणमा पुगेसँगै सरकारले केही दिन अघि सुरुङमार्ग भएर आवतजावत गर्ने सवारीसाधनका लागि दस्तुर निर्धारण गरेको थियो । जसअनुसार सङ्घीय राजधानी प्रवेश गर्ने कार र भ्यानले रु ६५ र बाहिरिँदा रु ६० तिर्नुपर्नेछ । साथै मिनिबस र मिनिट्रकलाई राजधानी आउँदा रु ११५ र बाहिरिँदा रु ८०, बस र ट्रकले आउँदा रु २६० र फर्कँदा रु २०० तिर्नुपर्नेछ । त्यसैगरी भारी उपकरणका सवारीसाधनको हकमा भने काठमाडौँ आउँदा रु ६०० र फर्कँदा रु २०० दस्तुर निर्धारण गरिएको छ ।
सुरुङमार्ग सञ्चालनमा आएपछि यात्रामा समयको बचत हुनुका साथै ढुवानी मूल्य पनि घट्ने अपेक्षा गरिएको छ । कूल २ दशमलव ६८८ किलोमिटर लम्बाइको उक्त सुरुङमार्गमा तीन दशमलव पाँच मिटर चौडाइका दुई वटा लेन छन् । सुरुङमार्गको दुवैतर्फ नाली पनि बनाइएको छ ।
प्रतिक्रिया