काठमाडौं । अस्ट्रेलिया भ्रमणरत नेपाल राष्ट्रिय क्रिकेट टोलीले मंगलबार भएको खेलमा अस्ट्रेलियाको क्रिकेट एसिटी (ACT) विरुद्ध ४१ रनको विजय हासिल गरेको छ ।
टस जितेर पहिले फिल्ड रोजेको एसिटीविरुद्ध नेपालले ब्याटिङ गर्दै निर्धारित ओभरमा आठ विकेटको क्षतिमा १७७ रनको योगफल खडा गर्यो । ओपनर आशिफ शेखले आक्रमणात्मक खेल प्रस्तुत गर्दै ३९ बलमा ६९ रन जोडे । कप्तान रोहित पौडेलले २८ बलमा २६ रन बनाए भने आरिफ शेखले १८ बलमा २४ रन थपे । अन्य ब्याट्सम्यानहरू भने ठूलो योगदान दिन नसके पनि नेपालले मध्यम लक्ष्य प्रस्तुत गर्न सफल भयो ।
१७८ रनको लक्ष्य पछ्याउँदै मैदानमा उत्रिएको एसिटी टोली १७.२ ओभरमै १३६ रनमा अलआउट भयो । नेपाली बलरहरूले संयमित बलिङ गर्दै विपक्षीलाई दबाबमा राखेपछि सहज जित सम्भव भएको हो ।
नेपाल क्रिकेट सङ्घ (क्यान) का अनुसार, अस्ट्रेलिया भ्रमणमा रहेको नेपालले अगस्ट २६ देखि ३० तारिखसम्म क्रिकेट एसिटी र साउथ अस्ट्रेलियाविरुद्ध अभ्यास खेल खेल्ने तालिका छ । नेपालले दुबै टोलीसँग दुई-दुई वटा टी-२० खेल्नेछ भने अगस्ट ३० मा साउथ अस्ट्रेलियासँग एकदिवसीय खेल खेलिनेछ ।
यस जितसँगै अस्ट्रेलियाली भूमिमा नेपालको आत्मविश्वास थप उच्च बनेको छ र आगामी खेलहरूमा पनि उत्साहजनक प्रदर्शन गर्ने अपेक्षा गरिएको छ ।
प्रतिक्रिया