काठमाडौं । दोलखामा भएको मोटरसाइकल दुर्घटनामा गौरीशङ्कर बहुमुखी क्याम्पसका स्ववियु सभापति शिरिष बस्नेतसहित दुई जनाको ज्यान गएको छ ।
गएराति करिब ९ बजे भीमेश्वर नगरपालिका-६ रमिटेडाँडामा भएको दुर्घटनामा स्ववियु सभापति २४ वर्षीय शिरिष बस्नेतको उपचारको क्रममा चरिकोटस्थित च्छो रोल्पा अस्पतालमा मृत्यु भएको जिल्ला प्रहरी कार्यालय दोलखाले जनाएको छ । भीमेश्वर नगरपालिका-५ माटीका स्थानीय बस्नेतले बा.५३ प ८८९९ नम्बरको मोटरसाइकल चलाइरहेका थिए ।
उक्त मोटरसाइकलमा सवार बैतेश्वर गाउँपालिका-३ मिर्गे निवासी २६ वर्षीय श्याम बहादुर खत्री (सुजन) को पनि ज्यान गएको छ ।
बस्नेतले चलाएको मोटरसाइकल लामोसाँघु-जिरी सडकखण्डमा बा. प्र.०२-०३४ प ३२४२ नम्बरको अर्को मोटरसाइकलसँग ठोक्किँदा दुर्घटना भएको हो । सो मोटरसाइकल चालक बैतेश्वर गाउँपालिका-५ का २५ वर्षीय निर्मल खड्का सामान्य घाइते भएका छन् । उनलाई प्रहरीले नियन्त्रणमा लिएको जनाएको छ ।
प्रतिक्रिया