काठमाडौं । सरकारले फेसबुक, ट्विटरलगायत सामाजिक सञ्जालमाथि लगाइएको प्रतिबन्ध हटाएको छ । सोमबार राति बसेको मन्त्रिपरिषद् बैठकले प्रतिबन्ध फुकुवा गर्ने निर्णय गरेको हो ।
बैठकमा प्रधानमन्त्री केपी शर्मा ओलीले सामाजिक सञ्जाल प्रतिबन्ध हटाउने प्रस्तावमा असहमति जनाउँदै, विदेशी कम्पनीहरूले नेपाललाई हेपेको भन्दै यसलाई राष्ट्रिय स्वाभिमानसँग जोड्नुपर्ने बताएका थिए । तर, कांग्रेसका केही मन्त्रीहरूले प्रधानमन्त्रीसँग असहमति जनाउँदै नागरिकको सूचना-अधिकार र स्वतन्त्र अभिव्यक्ति रोक्न नहुने तर्क गरेका थिए ।
बैठकपछि सरकारका प्रवक्ता एवं सूचना प्रविधि मन्त्री पृथ्वी सुब्बा गुरुङले, “सामाजिक सञ्जाल सुरु भइसकेको छ” भनेर प्रतिबन्ध औपचारिक रूपमा हटाइएको घोषणा गरेका थिए। उनले विदेशी कम्पनीहरूलाई दर्ता गर्न आग्रह गर्दा “तेरो देशमा भ्रष्टाचार छ, त्यसैले सूचीकरण हुँदैनौं” भन्ने जवाफ आएको दाबीसमेत गरेका थिए ।
यसैबीच, आज दिनभर काठमाडौंसहित देशभर जेनजी आन्दोलनले सडक तताएको छ । सामाजिक सञ्जाल बन्द र शासकीय अव्यवस्थाविरुद्ध सुरु भएको आन्दोलनकै चर्को दबाबपछि सरकारले रातारात सामाजिक सञ्जाल प्रतिबन्ध हटाउने निर्णय गरेको बुझिएको छ ।
प्रतिक्रिया