काठमाडौं । नेकपा माओवादी केन्द्रको केन्द्रीय समिति बैठक आजबाट सुरु हुँदैछ ।
बिहान ११ बजेदेखि कमलादीस्थित प्रज्ञा प्रतिष्ठानमा बस्ने बैठकमा पार्टी अध्यक्ष पुष्पकमल दाहाल ‘प्रचण्ड’ले समसामयिक राजनीतिक प्रस्ताव पेश गर्नेछन् । सो प्रस्तावमाथि केन्द्रीय सदस्यहरुले विभिन्न समुह बनाएर छलफल गर्ने बताइएको छ ।
अध्यक्ष प्रचण्डले यसअघि नै पार्टीलाई रुपान्तरणका लागि आगामी मंसिरमा विशेष महाधिवेशनमा लैजाने प्रस्ताव पदाधिकारी र स्थायी समिति बैठकमा पेश गरेका थिए । दुवै बैठकले सो प्रस्तावलाई पारित गरेको छ ।
प्रचण्डको प्रस्तावमा जेनजी आन्दोलनपछि उत्पन्न परिस्थितिको विश्लेषण गर्दै पार्टीको नेतृत्वमा युवा पुस्तालाई बढी भन्दा बढी सहभागी गराउने, नेतृत्व हस्तान्तरण गर्ने, हाल मौजुदा केन्द्रीय समितिदेखि सबै तहका पार्टी कमिटीहरु विघटन गर्ने र अध्यक्षको संयोजकत्वमा महाधिवेशन आयोजक समिति बनाउने रहेको छ ।
हिजो बसेको स्थायी समिति बैठकले प्रचण्डको प्रस्तावलाई पारित गरेको थियो भने तोकिएको समयमा निर्वाचन सम्पन्न गर्न सरकारलाई ध्यानाकर्षण गराउने र आवश्यक भूमिकामा सक्रिय हुने निर्णय गरेको थियो।
केन्द्रीय समिति बैठक दुई दिनसम्म चल्ने बताइएको छ । बैठकका लागि सबै सदस्यहरुसँग प्रतिव्यक्ति एक हजार रुपैयाँ उठाइएको छ । त्यो रकम रकम हल भाडा, खाजा, पानी लगायत व्यवस्थापन खर्चका लागि प्रयोग हुनेछ।
प्रतिक्रिया