सुनसरी । अविरल वर्षाका कारण सप्तकोशी नदीमा पानीको बहाव अत्यधिक बढेको छ । पानीको सतह उच्च भएपछि कोशी ब्यारेजका सबै ५६ ढोका खोलिएका छन् ।
सुनसरीका प्रमुख जिल्ला अधिकारी धर्मेन्द्रकुमार मिश्रका अनुसार, शुक्रबार रातिदेखि निरन्तर वर्षा भइरहेकाले आज बिहान ८:१५ बजे पानीको प्रवाह प्रति सेकेन्ड तीन लाख ३५ हजार ३६० क्युसेक नाघेपछि सबै ढोका खोलिएको हो ।
उनले भने, “पानीको सतह लगातार बढ्दै गइरहेको छ । जोखिमको सङ्केतस्वरूप ब्यारेजमा रातो बत्ती बालिएको र रातो झण्डा फहराइएको छ ।”
सप्तकोशी जलमापन कन्ट्रोल रुमले पनि जलसतह जोखिम विन्दुभन्दा माथि पुगेको पुष्टि गरेको छ ।
प्रमुख जिल्ला अधिकारी मिश्रले उदयपुर र सुनसरीका तटीय क्षेत्रका बासिन्दालाई सतर्क रहन आग्रह गरेका छन् । बाढीका कारण केही स्थानमा जोखिम बढ्न सक्ने उनले चेतावनी दिएका छन् ।
प्रतिक्रिया