काठमाडौं । बुधबार रातिदेखि परेको अविरल वर्षाका कारण सप्तकोशी नदीमा पानीको बहाव बढेपछि कोशी ब्यारेजका ४३ वटा ढोका खोलिएका छन् ।
शनिबार बिहान ६ बजेपछि गरिएको मापनअनुसार कोशी ब्यारेजमा पानीको बहाव प्रतिसेकेन्ड ३ लाख १६ हजार ७९५ क्युसेक पुगेपछि ४३ वटा ढोका खोलिएको हो ।
यसअघि शुक्रबार बिहान १० बजे पानीको बहाव प्रतिसेकेन्ड १ लाख ९८ हजार २२० क्युसेक पुगेपछि २५ वटा ढोका खोलिएका थिए । त्यसपछि पानीको बहाव निरन्तर बढ्दै गएपछि दिउँसो १ बजे २ लाख २९ हजार ९६० क्युसेक पुगेको थियो । सो समयमा ३० वटा ढोका खोलिएको थियो ।
त्यस्तै, दिउँसो २ बजे पानीको बहाव प्रतिसेकेन्ड २ लाख ४० हजार ५५५ क्युसेक पुगेपछि थप एउटा ढोका खोल्दै ३१ वटा ढोका खुला गरिएको थियो ।
कोशी ब्यारेजमा पानीको बहाव बढेपछि जोखिमको सङ्केतस्वरूप पश्चिमतर्फ रातो बत्ती बाल्ने गरिन्छ । सप्तकोशीमा जलसतह निरन्तर बढिरहेको भन्दै आसपासका बासिन्दालाई आवश्यक सतर्कता अपनाउन र जोखिमपूर्ण क्षेत्रमा नजान आग्रह गरिएको छ ।
प्रतिक्रिया