नेपालले कतारलाई दियो १७१ रनको लक्ष्य

काठमाडौं । आईसीसी टी-२० विश्वकप छनोटको तयारीस्वरूप आयोजित अभ्यास खेलमा नेपाली राष्ट्रिय क्रिकेट टोलीले कतारविरुद्ध १७० रनको लक्ष्य प्रस्तुत गरेको छ ।

टस जितेर पहिले ब्याटिङ गरेको नेपालले निर्धारित २० ओभरमा ७ विकेटको क्षतिमा १७० रन जोड्यो ।

नेपालका लागि ओपनर कुशल भुर्तेलले उत्कृष्ट प्रदर्शन गर्दै ३३ बलमा ५६ रनको अर्धशतकीय योगदान गरे । यस्तै, कुशल मल्लले २० बलमा ३८ रन अविजित रहँदै बनाउँदा, दीपेन्द्रसिंह ऐरीले पनि २१ बलमा ३८ रनको आक्रामक पारी खेले ।

अभ्यास खेलमा नेपालले बलिङ र फिल्डिङ संयोजन पनि परीक्षण गरिरहेको छ । यसअघि शनिबार भएको वार्मअप खेलमा नेपालले ओमानलाई ६ विकेटले पराजित गरेको थियो ।

आगामी टी-२० विश्वकप छनोट प्रतियोगिताका लागि टोलीले आत्मविश्वासपूर्ण तयारी गरिरहेको र कतारविरुद्धको खेल त्यसको महत्वपूर्ण अभ्यासका रूपमा लिइएको नेपाली टिम व्यवस्थापनले जनाएको छ ।