काठमाडौं । पूर्वगृहमन्त्री रमेश लेखकले गृहमन्त्रीको हैसियतले भदौ २३ गते भएको जेनजी आन्दोलनका क्रममा बल प्रयोगको आदेश नदिएको बताएका छन् ।
शुक्रबार नेपाली कांग्रेस केन्द्रीय कार्यालयमा पत्रकारहरूसँग कुरा गर्दै लेखकले प्रदर्शनमा गृहमन्त्रीको हैसियतले आफूले बल प्रयोग गर्न आदेश नदिएको बताएका हुन् ।
लेखकले भने, “बल प्रयोग गर्ने विषयमा गृहमन्त्री र प्रधानमन्त्रीले निर्देशन गरेको भन्ने सवाल उठेका छन् । प्रधानमन्त्रीज्यू वा मेरो तर्फबाट कुनै किसिमको बल प्रयोगको आदेश दिइएको थिएन। धेरै मानिसहरूले ज्यान गुमाए, मलाई गहिरो पीडा भयो ।”
लेखकले आन्दोलनका क्रममा धेरै मानिसको मृत्यु हुनु, सरकारी तथा व्यक्तिगत सम्पत्तिमा आगजनी हुनुजस्ता घटनाप्रति गहिरो दुःख प्रकट गर्दै तत्काल गृहमन्त्रीको पदबाट राजीनामा दिएको बताए। उनले जेनजीका माग सकारात्मक भए पनि प्रदर्शनमा घुसपैठ भएको दाबी गरे ।
लेखकले कानुनी शासनको मान्यताभित्र बसेर काम गर्न सरकार र जाँचबुझ आयोगलाई आग्रह पनि गरे । आग्रह, पूर्वाग्रह र प्रतिशोधबाट माथि उठेर काम अघि बढाउनुपर्ने उनेको भनाइ थियो ।
प्रतिक्रिया