खजुरामा कुखुरा फारम भित्र जुवा अड्डा, ५ जना जुवाडे पक्राउ

खजुरा । बाँके प्रहरीले कुखुरा फाराम भित्र संचालन भइरहेको जुवा अड्डामा छापा मारेर ५ जना जुवाडेलाई पक्राउ गरेको छ । खजुरा ४ डि गाउँ स्थित दिनेश शाहीले सञ्चालन गरेको ब्रोइलर कुखुरा पालन गर्न बनाइएको टहरो भित्र संचालन गरिएको जुवा अड्डामा प्रहरीले छापा मारेको हो ।

हारजित हुने गरी जुवा ताश खेलीरहेको भन्ने सूचनाको आधारमा जिल्ला प्रहरी कार्यालय, बाँकेबाट खटिएको टोलीले छापा मारेर जानकी गाउँपालिकाका कृष्ण चौधरी, खजुरा ३ शैलेन्द्र कुमार मिश्रा, गोपाल बुढा क्षेत्री र आशिष गुरुङ तथा बर्दीया बढैयातालका राजेश गुरुङलाई पक्राउ गरिएको प्रहरीले जनाएको छ।

जुवातास खेलिरहेका १०र१२ जना मध्य पक्राउ परेकाहरु बाहेक प्रहरीलाई देखे लगत्तै भागेको बाँके प्रहरी प्रवक्ता डीएसपी दीपक पतालीले बताए । उनका अनुसार जुवा खालबाट प्रहरीले नगद ४७ हजार ३० रुपैयाँ र १ गड्‌डी तास बरामद भएको छ । पक्राउ परेकाहरुमाथि अनुसनधान भइरहेको डीएसपी पतालीले बताए ।