झापा । ‘जेनजी आन्दोलन’का क्रममा प्रहरीको हतियार लुटपाटमा संलग्न एक व्यक्ति सहित आठ जना लागुऔषध (खैरो हिरोइन) सहित झापाबाट पक्राउ परेका छन् ।
इलाका प्रहरी कार्यालय दमकका अनुसार शनिबार साँझ दमक नगरपालिका–३ स्थित भुटानी शरणार्थी शिविर, सेक्टर–१ को एक छाप्रोबाट उनीहरूलाई पक्राउ गरिएको हो । लागुऔषध बिक्री भइरहेको भन्ने सूचनाका आधारमा खटिएको प्रहरी टोलीले उनीहरूलाई नियन्त्रणमा लिएको हो ।
प्रहरीले पक्राउ परेकाको साथबाट ७ ग्राम ८ सय मिलिग्राम खैरो हिरोइन (ब्राउन सुगर) बरामद गरेको जनाएको छ ।
पक्राउ परेकामध्ये आदित्य लिम्बू ‘जेन्जी आन्दोलन’का क्रममा इलाका प्रहरी कार्यालय दमकबाट प्रहरीको हतियार लुट्ने घटनामा संलग्न रहेको खुलासा भएको प्रहरीले जनाएको छ । त्यस्तै, मोरङ मिक्लाजुङ–८ का निश्चल पोर्तेल गत भदौ २४ गते उर्लाबारी प्रहरी हिरासतबाट भागेका व्यक्ति भएको पाइएको छ ।
अन्य पक्राउ पर्नेहरूमा साजन थापा, दिपेश तामाङ, सनम राई, पविन विश्वकर्मा, सुचन दर्जी र विजय माझी रहेका छन् ।
पक्राउ परेकामाथि लागुऔषध नियन्त्रण ऐनअन्तर्गत थप अनुसन्धान भइरहेको इलाका प्रहरी कार्यालय दमकले जनाएको छ ।
प्रतिक्रिया