नेपालगन्ज । गत भदौ २४ गते जेनजीको आन्दोलनका क्रममा नेपालगन्ज स्थित उच्च अदालत तुलसीपुर इजलास, नेपालगन्जमा तोडफोड, आगजनी र लुटपाट गर्ने ६ जनालाई बाँके प्रहरीले पक्राउ गरेको छ ।
उच्च अदालतमा तोडफोड, आगजनी र लुटपाट कार्यमा संलग्न ६ जनालाई पक्राउ गरिएको बाँके प्रहरी प्रवक्ता डीएसपी दिपक पातलीले जानकारी दिए ।
उनका अनुसार पक्राउ पर्नेहरुमा नेपालगन्ज-४ का रविकुमार वैश्य र एसनराज सिद्दिकी, नेपालगन्ज-९ का गंगासागर बर्मा र ओमराज सोनी, नेपालगन्ज-५ का मो. ताहिर हल्वाई र नेपालगन्ज-१० का बब्लु गोडिया रहेका छन् ।
उनीहरुविरुद्व अपराधिक उपद्रव सम्बन्धी कसुरमा परेको जाहेरीका आधारमा पक्राउ गरिएको प्रहरीले जनाएको छ ।
पक्राउ परेका उनीहरुलाई अदालतबाट ५ दिन म्याद थपेर अनुसन्धान थालिएको डीएसपी पातलीले बताए ।
भदौ २३ गते सुरु भएको जेनजी आन्दोलनमा राजधानी काठमाडौंमा राज्यपक्षको गोली प्रहारबाट युवा विद्यार्थीको ज्यान गएपछि आन्दोलन हिँसात्मक बनेको थियो । २४ गते भड्केको आन्दोलनमा संलग्न केही समुहले सरकारी, सार्वजनिक र व्यक्तिगत सम्पतिमा तोडफोड, आगजनी र लुटपाट गरेको थियो ।
प्रतिक्रिया