काठमाडौं । नेकपा (माओवादी केन्द्र)का दुई प्रमुख जनसंगठन—युवा सङ्घ वाइसिएल नेपाल र अखिल (क्रान्तिकारी) केन्द्रीय समितिले पार्टी अध्यक्ष पुष्पकमल दाहाल ‘प्रचण्ड’ विरुद्ध सामाजिक सञ्जालमार्फत गलत सूचना र भ्रम फैलाएको आरोप लगाउँदै साइबर ब्यूरोमा उजुरी दर्ता गरेका छन्।
बुधबार भोटाहिटीस्थित केन्द्रीय साइबर ब्यूरोमा बुझाइएको ज्ञापनपत्रमा पूर्व प्रहरी अतिरिक्त महानिरीक्षक देवेन्द्र सुवेदी र वरिष्ठ अधिवक्ता बालकृष्ण न्यौपानेले प्रचण्ड र माओवादी केन्द्रलाई लक्षित गर्दै ‘घर जलाएको’ र ‘दुई ट्रकमा दुई करोड रुपैयाँ लुटिएको’ भन्ने झूटा प्रचार गरेको दाबी गरिएको छ।
वाइसिएल अध्यक्ष पुष्प ओली र अखिल (क्रान्तिकारी)का अध्यक्ष विजय प्रकाश सापकोटाको संयुक्त हस्ताक्षर रहेको सो ज्ञापनपत्रमा ती दुवै व्यक्तिमाथि साइबर अपराध अन्तर्गत कानूनी कारबाही गर्न माग गरिएको छ।
ज्ञापनपत्र बुझाउने क्रममा वाइसिएल अध्यक्ष ओलीले माओवादी पार्टी विधिको शासनमा आस्था राख्ने भए पनि निष्पक्ष छानबिन नभए आन्दोलनमा उत्रिन बाध्य हुने चेतावनी दिएका थिए। उनले भने, “हामी हतियारविहीन सेना हौं, आज पनि सयौँ साथीहरूले शरीरमा गोलीका छर्रा बोकेका छन्। हजारौँको बलिदानबाट आएको यो व्यवस्था गणतन्त्रविरोधीहरूले मेटाउन खोजिरहेका छन्, तर वाइसिएल अब मौन बस्दैन।”
त्यस्तै वाइसिएल उपाध्यक्ष हरि ढकालले हालको जेनेजी आन्दोलन रूपान्तरणको आन्दोलन भएको बताउँदै माओवादी त्यसमा स्पष्ट रूपमा समर्थनमा रहेको उल्लेख गरे। उनले भने, “नेताहरूमा जस्तै प्रहरी संगठनभित्र पनि रूपान्तरण आवश्यक छ। यदि प्रहरी पुराना अधिकारीहरूलाई जोगाउने खेलमा लागे भने वाइसिएल चुप बस्दैन।”
साइबर ब्यूरो प्रमुख प्रहरी नायब महानिरीक्षक (डीआईजी) नवीन्द्र आर्यालले उजुरी ग्रहण गर्दै सत्यतथ्यका आधारमा निष्पक्ष छानबिन गर्ने प्रतिबद्धता जनाए। उनले भने, “विधिको शासन कायम राख्दै कुनै कसुर बाँकी नराखी अनुसन्धान अघि बढाइनेछ, र कसैलाई अन्याय गरिँदैन।”
वाइसिएल र अखिल (क्रान्तिकारी)ले जारी गरेको केन्द्रीय सर्कुलर अनुसार आज देशका सबै प्रमुख जिल्ला अधिकारी (सीडीओ) कार्यालयहरूमा पनि सोही विषयमा ज्ञापनपत्र बुझाइएको छ। दुवै संगठनले भ्रम फैलाउने गतिविधिबाट सचेत रहन युवाहरू र विद्यार्थीहरूलाई आग्रह गर्दै भनेका छन्, “सत्यलाई तोडमोड गरेर भ्रम फैलाउने कुनै पनि प्रयास सह्य हुनेछैन, आवश्यक परे सडकमा प्रतिवाद गरिनेछ।”
प्रतिक्रिया