दाङमा चैतमा फुल्ने ‘पलम’ असोजमै फुल्दा स्थानीय अचम्मित

दाङ । दाङको तुलसीपुर उपमहानगरपालिका-१९ छिल्लीकोटमा असोजमै पलमको फूल फुलेको छ । स्थानीय पूर्णबहादुर पुनको घरमा लगाइएको पलम असोज १५ गतेदेखि फुल्न थालेको हो ।

सामान्यतया पलम फागुन वा चैत महिनामा मात्रै फुल्ने गरे पनि यसवर्ष असोजमै फुल्न थालेपछि स्थानीयवासीहरू अचम्मित भएका छन् । “विगतमा फागुन-चैततिर फूल फुल्थ्यो, तर यसपटक असोजमै फुलेको देख्दा अचम्म लाग्यो,” स्थानीय प्रविर पुनले बताए ।

छिल्लीकोट क्षेत्रमा प्रायः प्रत्येक घरमा पलमका बोट छन् । तीमध्ये पुनको घरको बोटमा यसपालि असामान्य रूपमा फूल फुल्न थालेको हो । गत वर्ष पनि सोही क्षेत्रमा पुस महिनामै काफल पाकेको थियो ।

वनस्पतिविज्ञ खेमराज शर्माका अनुसार, यस्तो समयभन्दा अगाडि फूल फुल्नु जलवायु परिवर्तनको प्रत्यक्ष असर हो । उनले भने, “तापक्रममा निरन्तर वृद्धि हुँदै गएकाले वनस्पतिहरूमा जैविक समयक्रम बिग्रिएको छ । अहिले धेरै बोटबिरुवामा यस्तै समस्या देखिन थालेका छन् ।”