काठमाडौं । नेपाली कांग्रेसका केन्द्रीय सदस्य डा. शेखर कोइरालाले पार्टीभित्र चलिरहेको हस्ताक्षर अभियानलाई कांग्रेसमा ऊर्जा भर्ने सकारात्मक पहलका रूपमा व्याख्या गरेका छन् ।
पार्टीको केन्द्रीय कार्यसमिति बैठकमा धारणा राख्दै कोइरालाले उत्साहपूर्वक सञ्चालन भइरहेको हस्ताक्षर अभियानले पार्टीमा नयाँ ताजगी र उत्साह ल्याएको बताएका हुन् ।
उनले भने, “साथीहरूले उत्साहपूर्वक सञ्चालन गर्नुभएको हस्ताक्षर अभियानले कांग्रेसलाई नै ऊर्जा भन्ने हो भन्ने म बुझ्दछु । यी सबैको सम्बोधन ताजा र नियमित महाधिवेशनले मात्र सम्भव छ।”
कोइरालाले आगामी मंसिर महिनाभित्रै पार्टीको १५ औं महाधिवेशन सम्पन्न गर्नुपर्ने आवश्यकता औंल्याए । उनका अनुसार अन्य राजनीतिक दलहरू पनि मंसिरमै अधिवेशन गर्ने तयारीमा जुटिसकेकाले कांग्रेसले ढिलाइ गर्नु हुँदैन ।
“अन्य राजनीतिक दलहरू मंसिरमा अधिवेशन गर्ने प्रक्रियामा जुटिसकेका छन् भने हामी किन सक्दैनौं ?” उनले प्रश्न गर्दै थपे, “कांग्रेसलाई नयाँ दिशा र सम्भावनाको पार्टी बनाउन मंसिरमै महाधिवेशन गर्नुपर्छ ।”
उनले महाधिवेशनबारे केन्द्रीय कार्यसमितिबाट त्यसबारे ठोस निर्णय आउने विश्वास व्यक्त गरे ।
प्रतिक्रिया