अनमोलको ‘जेरी अन टप’ आजबाट देशभर प्रदर्शन

काठमाडौं । नेपाली सुपरस्टार अनमोल केसी अभिनीत बहुप्रतिक्षित चलचित्र ‘जेरी अन टप’ आज शुक्रबारबाट देशभर प्रदर्शनमा आएको छ । फ्राइडे रिलिजअन्तर्गत यो चलचित्रले देशभर दुई सयभन्दा बढी शो पाएको छ ।

सुयोग गुरुङको निर्देशनमा बनेको यो चलचित्रमा अनमोल केसीसँगै आँचल शर्मा, जसीता गुरुङ, केदार घिमिरे (माग्नेबुढा), भुवन केसी र उषा खड्गीको दमदार अभिनय देख्न सकिन्छ । अभिनेत्री सुरक्षा पन्तले यसमा विशेष भूमिका निर्वाह गरेकी छन् ।

‘जेरी अन टप’ अनन्या फिल्म्सको ब्यानरमा निर्माण भएको हो । सरोज न्यौपानेको प्रस्तुतिमा रोविन शेरचन, रामकृष्ण श्रेष्ठ र दीपक भण्डारीले लगानी गरेका छन् । चलचित्रको कथा हेमराज बिसीले लेखेका हुन् भने पटकथा र संवाद विश्वास तिम्सिनाले तयार पारेका छन् ।

सगरमाथा आरोहण र यात्राको क्रममा विकसित हुने प्रेमकथामा आधारित यस चलचित्रमा संगीत कालिप्रसाद बास्कोटा, जयन जे वाइबा, जोहन चाम्लिङ राई र व्रिजेश श्रेष्ठले दिएका छन् । छायांकन दुलीप रेग्मीले गरेका हुन् ।

‘जेरी अन टप’लाई दर्शकले निकै उत्साहका साथ प्रतिक्षा गरिरहेका थिए, र आजदेखि देशभरका हलहरूमा यसको प्रदर्शन सुरु भएको छ ।