काठमाडौं । प्रधानमन्त्री सुशीला कार्कीले दलहरूसँग छलफल थालेकी छन् । उनले शुक्रबार साँझ माओवादीका वरिष्ठ उपाध्यक्ष नारायणकाजी श्रेष्ठ र उपमहासचिव वर्षमान पुनसँग बालुवाटारमा भेटवार्ता गरेकी छन् । चुनावी वातारणका लागि राजनीतिक सहमति जुटाउन प्रधानमन्त्री कार्कीले दलहरुसँग संबाद थालेकी हुन् ।
जेनजी आन्दोलनपछि दलहरूसँग संवादका लागि सरकार उदाशीन भएको आरोप लागेका बेला प्रधानमन्त्री कार्कीले राजनीतिक संवाद थालेकी छन् । गत साता मात्र राष्ट्रपतिको अग्रसरतामा शीलतनिवासमा सर्वदलीय बैठक भएको थियो । उक्त बैठकमा प्रधानमन्त्रीले आफैंले दलहरूसँग छलफल अघि बढाउने उल्लेख गरेकी थिइन् ।
जेनजीका प्रतिनिधिहरूसँग बिहीबार पहिलो चरणको वार्ता भएपछि प्रधानमन्त्रीले दलहरूसँग संवाद गर्न थालेकी हुन् ।
शुक्रबार माओवादी नेताहरूसँगको भेटमा उनले चुनाव गराउन सरकार लागिसकेकाले यसका लागि दलहरूले सहयोग गर्नुपर्ने धारणा राखेकी थिइन् ।
माओवादीले पहिले नै चुनावमा जाने निर्णय गरिसकेका कारण प्रधानमन्त्रीले माओवादीका नेताहरुबाट संवाद थालेको बुझिएको छ । भेटका क्रममा माओवादी नेताहरुले चुनावका लागि वातावरण उपयुक्त बन्नुपर्ने सुभाव दिएका थिए । चुनावका लागि चाहिने वातावरण बनाउन सरकारले सबै काम गर्नुपर्ने आफुहरुले सुझाव दिएको माओवादी केन्द्रका उपमहासचिव पुनले बताए ।
राष्ट्रपतिले सर्बदलीय बैठकमा दलहरूको चासो मुख्य विषय भएको भन्दै यसको सम्बोधन गर्न गत साता प्रधानमन्त्री र गृहमन्त्रीको ध्यानकर्षण गराएका थिए । सो बैठकमा प्रधानमन्त्री र गृहमन्त्रीले वातावरण बनाउने प्रतिबद्धता जनाएका थिए ।
प्रधानमन्त्री कार्कीले अब सबै दलका नेताहरूलाई पालोपालो निरन्तर भेट गर्ने कार्यसूची बनाएकी उनी निकट स्रोतले जनाएको छ ।
प्रतिक्रिया