काठमाडौं । यूएईमा जारी आईसीसी विश्वकप लिग-२ अन्तर्गत यूएई, नेपाल र अमेरिका सम्मिलित त्रिकोणात्मक सिरिजमा नेपालले लगातार तेस्रो खेलमा पराजय बेहोरेको छ ।
शनिबार अमेरिकासँग चार विकेटले पराजित भएसँगै नेपाल यस भ्रमणमा अहिलेसम्म अंकविहीन बनेको छ । अब नेपालको एक मात्र खेल यूएईसँग बाँकी छ । अन्तिम खेलमा जित हासिल गरे नेपालले २ अंक बटुल्नेछ, हारेमा भने अंकविहीन हुँदै फर्किनेछ ।
शुक्रबारको खेलमा २७२ रनको चुनौतीपूर्ण लक्ष्य दिए पनि बलिङ र फिल्डिङमा कमजोरी देखिँदा नेपाल ६ बल बाँकी रहँदै चार विकेटले पराजित भयो ।
अमेरिकाको जितमा साइतेजा मुक्कमल्लाले उत्कृष्ट ब्याटिङ गर्दै ७५ रन बनाए भने मिलिन्द कुमारले ७० रनको योगदान दिए । यस्तै सायन जहांगिरले ३६, मोनांक पटेलले २१, सुभम रनजनीले १९, समित पटेलले १६ र हरमित सिंहले १३ रन जोडे ।
नेपालका लागि बलिङतर्फ सन्दीप लामिछानेले ३ विकेट लिए भने नन्दन यादव, करण केसी र गुलशन झाले १/१ विकेट हात पारे ।
यसअघि टस हारेर पहिले ब्याटिङ गरेको नेपालले ४९.५ ओभरमा अलआउट हुँदै २७१ रनको सम्मानजनक योगफल बनाएको थियो । नेपालका लागि दीपेन्द्र सिंह ऐरीले ६७ बलमा २ चौका र ३ छक्का प्रहार गर्दै ७५ रनको अर्धशतकीय पारी खेले ।
त्यस्तै करण केसीले आक्रामक प्रदर्शन गर्दै ३१ बलमा २ चौका र ३ छक्कासहित ४९ रन बनाए । कुशल भुर्तेलले ४७ रन, भीम सार्कीले ४३ रन र कप्तान रोहितकुमार पौडेलले ३६ रनको योगदान दिए ।
बलिङमा अमेरिकाका हरमित सिंहले सर्वाधिक ३ विकेट लिए भने सौरभ नेत्रभालकर र नोस्तुज केन्जीले २/२ तथा जसदीप सिंह र सुभम रनजनीले १/१ विकेट हात पारे ।
प्रतिक्रिया