काठमाडौं । आईसीसी क्रिकेट विश्वकप लिग-२ अन्तर्गत नेदरल्यान्ड्समा जारी त्रिकोणात्मक एकदिवसीय शृंखलामा लगातार दुई खेल गुमाएको नेपालले सोमबार नामिबियासँग जित निकाल्ने लक्ष्यसहित मैदान उत्रँदै छ । नेपाल र नामिबियाबीचको खेल नेपाली समयअनुसार सोमबार दिउँसो ४ः४५ बजे सुरु हुनेछ ।
शृंखलाको पहिलो दुई खेलमा नामिबिया र नेदरल्यान्ड्ससँग समान ६ विकेटको हार बेहोरेपछि नेपालको विश्वकप ग्लोबल क्वालिफायरमा सिधै स्थान बनाउने सम्भावना थप चुनौतीपूर्ण बनेको छ । त्यसैले नेपालका लागि नामिबियाविरुद्धको खेल ‘गर या मर’को अवस्थाजस्तै बनेको छ ।
नेपालले पहिलो खेलमा १५८ रनको लक्ष्य प्रस्तुत गरे पनि नामिबियाले दुई विकेट मात्र गुमाएर ३७.४ ओभरमा लक्ष्य भेट्टाएको थियो । दोस्रो खेलमा पनि नेपालले १५८ रनमै सीमित भएपछि नेदरल्यान्ड्सले ३५ ओभरमै चार विकेटको क्षतिमा लक्ष्य पूरा गर्दै जित हात पारेको थियो ।
दुवै खेलमा नेपाली टोली ब्याटिङ, बलिङ र फिल्डिङ तीनै विभागमा अपेक्षाअनुसार प्रदर्शन गर्न असफल भएको थियो। शीर्षक्रमका ब्याटरले ठूलो साझेदारी बनाउन नसक्नु र बलरहरूले विपक्षीमाथि दबाब कायम राख्न नसक्नु नेपालको हारको मुख्य कारण बनेको छ ।
अर्कोतर्फ आयोजक नेदरल्यान्ड्सले नेपाल र नामिबियालाई पराजित गर्दै लगातार दोस्रो जित निकालेको छ। ३० खेलबाट ३६ अंक जोडेको नेदरल्यान्ड्स अंक तालिकाको तेस्रो स्थानमा बलियो बनेको छ । नेपाल र नामिबिया भने समान ३० खेलबाट २४-२४ अंकसहित क्रमशः पाँचौँ र छैटौँ स्थानमा रहेका छन् ।
नेपालले सोमबार नामिबियासँग खेलिसकेपछि शृंखलाको अन्तिम खेल बुधबार पुनः नेदरल्यान्ड्ससँग खेल्नेछ । विश्वकप छनोटको सम्भावना कायम राख्न नेपालले बाँकी सबै खेल जित्नुपर्ने दबाबमा रहेको छ ।
प्रतिक्रिया