काठमाडौं । फ्रेन्च लिग-१ अन्तर्गत पेरिस सेन्ट जर्मेन (पिएसजी)ले इन्जुरी समयको अन्तिम मिनेटमा गोल गर्दै लियोनमाथि सनसनीपूर्ण जित निकालेको छ ।
निर्धारित समयपछि थपिएको पाँचौं मिनेटमा जोएओ नेभेसले हेडमार्फत निर्णायक गोल गर्दै पिएसजीलाई ४-३ को जित दिलाए ।
अतिरिक्त समयको तीन मिनेटअघि लियोनका डिफेन्डर निकोलस ट्याग्लियाफिको लगातार दोस्रो पहेँलो कार्ड पाएपछि मैदानबाट बाहिरिएका थिए । खेलमा दुई मिनेटपछि पिएसजीले निर्णायक गोल गर्दै जित सुनिश्चित गरेको हो ।
रोमाञ्चक बनेको खेलको पहिलो हाफमै लगातार तीन गोल भएका थिए । खेलको २६औं मिनेटमा वारेन जायर एमरीले पिएसजीलाई अग्रता दिलाए भने ३० औं मिनेटमा लियोनका अफोन्सो मोरेइराले बराबरी गोल फर्काए । त्यसपछि ३३ औं मिनेटमा खिभिखा काभारात्खेलियाले गोल गर्दै पिएसजीलाई पुनः अग्रता दिलाएका थिए ।
दोस्रो हाफको ५०औं मिनेटमा लियोनका आइन्सली मेटल्यन्डले गोल गर्दै खेल बराबरीमा फर्काए पनि अन्ततः इन्जुरी समयको अन्तिम क्षणमा पिएसजीले बाजी मारेको हो ।
यो जितसँगै १२ खेलपछि पिएसजी २७ अंकसहित तालिकाको शीर्ष स्थानमा कायम रहेको छ ।
प्रतिक्रिया