काठमाडौं । नेपाल वायु सेवा निगमले रिक्त रहेको महाप्रबन्धक पदमा खुला प्रतिस्पर्धात्मक प्रक्रिया मार्फत नियुक्ति गर्नका लागि दरखास्त आह्वान गरेको छ ।
बुधबार एक सूचना प्रकाशित गर्दै निगमले आवश्यक योग्यता पुगेका इच्छुक उम्मेदवारहरूले पन्ध्र दिनभित्र आफ्नो आवेदन पेश गर्न सक्ने जनाएको छ । इच्छुक उम्मेदवारले दरखास्त संस्कृति, पर्यटन तथा नागरिक उड्डयन मन्त्रालय, सिंहदरबार, काठमाडौंमा बुझाउनुपर्ने सूचनामा उल्लेख गरिएको छ ।
यसअघि, प्रधानमन्त्री सुशीला कार्कीले नेपाल वायु सेवा निगममा खुला प्रतिस्पर्धाबाट महाप्रबन्धक नियुक्त गर्ने प्रक्रियामा भएको प्रगतिबारे मन्त्रालयसँग प्रतिवेदन माग गरेकी थिइन् । उनले बुधबार पर्यटनमन्त्रीको रूपमा मन्त्रालयका सचिव हरि मैनालीलाई बोलाएर प्रक्रियाको विवरण प्रस्तुत गर्न निर्देशन दिएकी थिइन् ।
प्रधानमन्त्री कार्कीले नै गत कात्तिक १४ गते निगममा महाप्रबन्धक नियुक्तिका लागि सचिव हरि मैनालीको संयोजकत्वमा छनोट समिति गठन गरेकी थिइन् । समितिमा क्याप्टेन केबी लिम्बू विज्ञ सदस्यका रूपमा र मन्त्रालयको योजना तथा प्रशासन महाशाखाका प्रमुख सहसचिव सदस्यसचिवका रूपमा रहेका छन् ।
नेपाल वायु सेवा निगममा स्थायी महाप्रबन्धक नहुँदा व्यवस्थापनमा समस्या देखिएको भन्दै सरकारले यो प्रक्रिया अघि बढाएको हो ।
प्रतिक्रिया