काठमाडौं । बाराको सिमरा क्षेत्रमा हिजोदेखि बढ्दै गएको तनाव र हिंसात्मक घटनाप्रति नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले गम्भीर चिन्ता व्यक्त गरेका छन्। उनले सामाजिक सञ्जालमार्फत आफ्नो धारणा सार्वजनिक गर्दै अवस्था थप बिग्रन नदिन सबैलाई उच्च संयमता अपनाउन अपिल गरेका छन्।
प्रचण्डले लोकतन्त्रमा राजनीतिक विचार-मतभिन्नता स्वाभाविक भए पनि त्यसलाई हिंसा, उक्साहट वा अराजक रूप दिनु लोकतान्त्रिक मूल्यविपरीत भएको उल्लेख गरेका छन्। उनले राजनीतिक तथा अभिव्यक्ति-स्वतन्त्रताप्रतिको सम्मान सुनिश्चित गर्दै दलका नेता–कार्यकर्ताले निर्वाधरूपमा हिँडडुल गर्न, सभा–समारोह गर्न सक्ने वातावरण निर्माण गर्न सरकारले विशेष ध्यान दिनुपर्ने बताएका छन्।
सिमरामा प्रदर्शन चर्किएपछि कर्फ्यू लागू भएको र स्थिति संवेदनशील बन्दै गएको पृष्ठभूमिमा प्रचण्डले आसन्न निर्वाचनमाथि कुनै पनि घटनाले नकारात्मक प्रभाव नपारोस् भनी सबै पक्षलाई जिम्मेवार बन्न आग्रह गरेका छन्। उनले स्थानीय पार्टी समितिहरूलाई क्षेत्रमा शान्त वातावरण कायम गर्न सहयोगात्मक भूमिका खेल्न निर्देशन दिएका छन्।
प्रतिक्रिया