काठमाडौं । नेपाल प्रिमियर लिग (एनपीएल)को दोस्रो संस्करणमा लुम्बिनी लायन्सले उत्कृष्ट प्रदर्शन गर्दै चितवन राइनोजविरुद्ध ६ विकेटको जित निकाल्दै विजयी अभियान सुरू गरेको छ । बिहीबार कीर्तिपुरस्थित त्रिवि क्रिकेट मैदानमा भएको खेलमा चितवनले दिएको १४२ रनको लक्ष्य लुम्बिनीले १८.३ ओभरमै चार विकेट गुमाएर पुरा गर्यो ।
लुम्बिनीका गुलबद्दिन नैबले अविजित ४४ रनको शानदार इनिङ खेल्दै टिमको जित सुनिश्चित गरे । उनले २४ बलमा तीन चौका र तीन छक्का प्रहार गरे । कप्तान रोहितकुमार पौडेलले पनि ४४ बलमा एक चौकासहित ३९ रन जोडी महत्त्वपूर्ण साथ दिए । ८१-३ को स्थितिबाट दुवैले चौथो विकेटका लागि ६० रनको साझेदारी गर्दै लुम्बिनीलाई सहज जितसम्म पुर्याए ।
ओपनर सन्दीप जोराले २८ रन जोड्दा डी‘एर्सी शर्टले ११ रन बनाए । दिलिपनाथ १० रनमा रनआउट भएका थिए। चितवनका रिजन ढकालले दुई विकेट लिए भने सोहेल तान्विरले एक विकेट हात पारे ।
यसअघि टस हारेर ब्याटिङमा उत्रिएको चितवनले निर्धारित २० ओभरमा सात विकेट गुमाउँदै १४२ रन बनाएको थियो । चितवनका मध्यक्रम व्याटर रवि बोपाराले ६६ रनको उत्कृष्ट पारी खेले । उनले चार चौका र तीन छक्का प्रहार गर्दै लगातार दोस्रो अर्धशतक समेत दर्ता गरे । कप्तान कुशल मल्लले २१ रन थपे भने सैफ जैबले सात बलमा १५ रन बनाए ।
लुम्बिनीका रुबेन ट्रम्पेलमानले उत्कृष्ट बलिङ गर्दै तीन विकेट लिए । अभिषेक गौतम र गुलबद्दिन नैबको नाममा दुई-दुई विकेट रह्यो ।
यो चितवनको दोस्रो खेल हो । पहिले खेलमा चितवनले कर्णाली याक्सलाई पराजित गरेको थियो भने लुम्बिनीको यो पहिलो खेलमा शानदार जित हो ।
भोलि (शुक्रबार) पोखरा एभेन्जर्स र सुदूरपश्चिम रोयल्स आमनेसामने हुने तालिका छ ।
प्रतिक्रिया