काठमाडौं । नेपाली कांग्रेसले आगामी निर्वाचनमा सक्रिय रूपमा सहभागी हुने निर्णय गरेको छ।
सानेपामा बसेको केन्द्रीय कार्यसमिति बैठकले माघ ११ गते निर्धारित राष्ट्रिय सभा निर्वाचन र फागुन २१ गते हुने प्रतिनिधिसभा निर्वाचन दुवैमा पार्टीले प्रतिस्पर्धा गर्ने औपचारिक निर्णय गरेको हो। कांग्रेसले सरकारलाई निर्वाचनमैत्री वातावरण निर्माण गर्न आग्रह गरेको छ।
निर्वाचन तयारीका लागि कांग्रेसले निर्वाचन आयोगमा दल दर्ता प्रक्रिया अघि बढाउने समेत निर्णय गरेको छ। बैठकमा महामन्त्री गगनकुमार थापाले प्रस्तावित निर्णयहरू प्रस्तुत गरेपछि केन्द्रीय समितिले सर्वसम्मत रूपमा अनुमोदन गरेको थियो। “प्रतिनिधिसभा निर्वाचनको मिति घोषणासँगै वर्तमान राजनीतिक परिस्थितिको स्वाभाविक समाधान निर्वाचन नै हो भन्ने ठहर गर्दै कांग्रेस निर्वाचनमा भाग लिने निर्णय गर्दछ,” महामन्त्री थापाले बैठकमा भने।
असोज २८ गतेदेखि सुरु भएको कांग्रेसको केन्द्रीय समिति बैठकबीचमा केही समय रोकिए पनि सहमतिको प्रयासपछि पुनः सुरु भई आज औपचारिक निष्कर्षमा पुगेको हो। बैठकले आगामी महाधिवेशनको टुंगो भने लगाउन सकेन ।
प्रतिक्रिया